Ի՞նչ կտա Հայաստանին ԱՄԷ-ի հետ Ազատ առևտրի համաձայնագիրը

Խորհրդարանի տնտեսական հանձնաժողովում քննարկվել է Հայաստան-Արաբական Միացյալ Էմիրություններ Ազատ առևտրի համաձայնագրի նախագիծը։ Այն ավելի դյուրին պայմաններ է նախատեսում առևտրի համար։ Կառավարությունը մտադիր է նաև սուբսիդավորել օդային կարգո փոխադրումների վառելիքի 50%-ը, ինչը կնվազեցնի արտահանման ծախսերն ու կխթանի հայկական ապրանքների մատակարարումը։

Հայաստան-ԱՄԷ տնտեսական համագործակցության առումով 2026թ, ըստ էկոնոմիկայի նախարար, ի լավագույն տարին է։ Գևորգ Պապոյանն ասում է, որ այս տարին ավելի լավ է բնութագրվում տնտեսական փոխհարաբերությունների բացարձակ թվերով․

«2024 թ.-ին ՀՀ-ԵՄ առևտրաշրջանառությունը շատ մեծ է եղել, բայց արտահանվել է ոսկի։ Ճիշտ այնպես, ինչպես այդ շրջանառությունը, մեզ  կարելի է ասել՝ ոչինչ  չտվեց, կամ զրոյին ձգտող տնտեսական էֆեկտ ունեցավ, այնպես էլ բացակայությունը մեր կյանքում որևէ կերպ չզգացվեց։ Բայց այս տարի հետաքրքիր թվային տվյալներ ունենք, և օրինակ՝  տեսնում ենք, որ բավականին տարբեր արտադրատեսակների ուղղություններով հետաքրքիր աճեր ունենք։ Հայկական ծագման ապրանքների արտահանումը դեպի ԱՄԷ  հունվար–սեպտեմբերին արդեն մոտ 130 միլիոն դոլար է կազմել, որը 2025 թվականի նույն ցուցանիշի նկատմամբ ավելի է մոտ 30 տոկոսով»։

Արտահանման աճին նպաստել են տարբեր ապրանքախմբեր։ Պապոյանն ընդգծում է՝ թեկուզ քիչ, բայց լոլիկի , ծիրանի, բալի, կեռասի, հատապտուղների արտահանման ծավալները սկսել են ավելանալ։ ՀՀ-ԱՄԷ շաբաթական 30 թռիչք է կատարվում՝ տեղեկացնում է նախարարը։ Բայց ապրանքները փոխադրվում են ինչպես ցամաքային, այնպես էլ օդային ճանապարհով․

«Օդայինի պարագայում մենք հիմա կառավարության որոշման նոր նախագիծ կընդունենք, որով կարգո փոխադրումների համար աջակցություն կտրամադրենք։ Արտահանման ռազմավարության մեջ մի քանի այդպիսի նպատակներ կան։ Երկրորդը՝ որևէ մայրաքաղաք, երրորդը՝ ԵԱՏՄ։ Կարող են լինել տնտեսական հանգույց։ Սա մեր ռազմավարությամբ է նաև ընդունված։ Սկսում ենք ԱՄԷ-ից»։  

Նախարարի խոսքով՝ մի քանի երկրի, նաև՝ ԱՄԷ ռեզիդենտ քաղաքացիներին ազատել են վիզայի պահանջից։ Սա հատուկ քաղաքականություն է՝ շեշտում է Պապոյանը։ ԱԺ տնտեսական հարցերի մշտական հանձնաժողովը քննարկում է ՀՀ-ԱՄԷ ազատ առևտրի համաձայնագրի նախագիծը։ Քննարկումների արդյունքում ավելացել են ոլորտները, որտեղ փոխադարձաբար կարող են ներդրումներ կատարել։ Գևորգ Պապոյանը թվարկում է դրանք․

 «Նոր ցանկի մեջ ներառված են համակարգչային և տեղեկատվական տեխնոլոգիաների ծառայությունները, գիտատեխնիկական խորհրդատվությունը, սարքավորումների սպասարկում և վերանորոգում, քարտեզագրում, հեռահաղորդակցություն, կրթություն, առողջապահություն, փոստ։ Ազգային անվտանգության տեսանկյունից, այդ կանոնը այստեղ գրված է․ եթե երկիրը համարում է ու հիմնավորում է, որ դա իր ազգային անվտանգության շահերի հետ կապված խնդիրներ է առաջացնում, ինքը կարող է կոնկրետ այդ օպերատորի հետ կապված սահմանափակում կիրառել»։