Երկրպագուն թքել է Թիկնիզյանի վրա, հայ պաշտպանը գոլից հետո էմոցիոնալ պատասխան է տվել

Սերբիայի Գավաթի խաղարկության քառորդ եզրափակիչի «Նովի Պազար» — «Ցրվենա Զվեզդա» (0:2) հանդիպումն ուղեկցվել է սկանդալային միջադեպերով, որոնց կենտրոնում հայտնվել է նաև Հայաստանի ազգային հավաքականի պաշտպան Նաիր Թիկնիզյանը։ Այս մասին տեղեկացնում է Mozzart Sport-ը։

Խաղը դադարեցվել է արդեն 28-րդ վայրկյանին, քանի որ տանտերերի երկրպագուները պիրոտեխնիկայի կիրառմամբ հարձակվել են հյուրերի երկրպագուների վրա: Միջամտել է ոստիկանությունը, և դադարը տևել է մոտ յոթ րոպե:

Բացի այդ, հանդիպման մեկնարկում Թիկնիզյանը դժգոհել է գլխավոր մրցավարին, որ հանդիսականներից մեկը թքել է իր վրա: Արդեն 38-րդ րոպեին հայ ֆուտբոլիստը տուգանային հրապարակի սահմաններից դուրս կատարած ֆանտաստիկ հարվածով բացել է հաշիվը և գոլը տոնելիս էմոցիոնալ կերպով ինչ-որ բան գոռացել տրիբունաների ուղղությամբ։ Թիմակիցները ստիպված են եղել հանգստացնել նրան։

Խաղից հետո Սերբիայի ֆուտբոլային միությունը խստորեն դատապարտել է «առանձին երկրպագուների պահվածքն ու տրիբունաներում պիրոտեխնիկայի հաճախակի դարձած կիրառումը»: Կազմակերպության գլխավոր քարտուղար Բրանկո Ռադույկոն պահանջել է հանդիպել երկրի բարձրագույն և երկրորդ դիվիզիոնների ղեկավարների հետ՝ քննարկելու բռնության կանխարգելմանը և մարզադաշտերում անվտանգության մակարդակի բարձրացմանն ուղղված լրացուցիչ միջոցառումներ:

armsport.am