Ամասիայի տարածաշրջանի հայրենիքի պաշտպանները մեկնեցին ծառայության

Հունվարի 8-ից Շիրակի մարզում մեկնարկել է ձմեռային զորակոչը: Արդեն զորակոչվել են Գյումրիի, Արթիկի, Անիի և հարակից բնակավայրերի 18 տարին լրացած զինակոչիկները: Ծառայության են պատրաստվում նաև Ամասիայի, Աշոցքի և Ախուրյանի երիտասարդները: Շիրակցի այս նորակոչիկներն առաջինն են, որ կծառայեն արդեն կրճատված ժամկետով՝ 2-ի փոխարեն 1.5 տարի․ 2026 թվականի ձմեռային զորակոչից սկսած պարտադիր ժամկետային զինվորական ծառայության տևողությունը:

Ամասիայի տարածաշրջանի 18 բնակավայրերից 11 երիտասարդ է զորակոչվում: Ավանդույթի համաձայն, զորակոչի նախօրեին Ամասիայի «Սուրբ Գևորգ» եկեղեցում զորակոչիկների օրհնության կարգ է կատարվում: Համայնքի ղեկավար Ջեմմա Հարությունյանը բարի ու անվտանգ ծառայություն է մաղթում հայրենիքի ապագա պաշտպաններին:

«Մենք այստեղ ձեր շնորհիվ ենք հզոր և հպարտ զգում, գիտենք, որ ձեր նմաններն են մեր սահմանները պահպանում: Մեկ անգամ ևս ձեզ բարի ծառայություն եմ ցանկանում։ Սիրելի ծնողներ, ձեզ էլ համբերություն եմ ցանկանում, որ անփորձանք, ձեր երեխաներին ինչպես ճանապարհում եք, այնպես էլ ընդունեք»:

«Միշտ փորձել եմ նմանվել պապիկիս։ Պապիկս էղել է շատ հայրենասեր մարդ: Ես փոքրուց տեսել եմ իրա հայրենասիրությունը ու միշտ ուզեցել եմ իրա պես էղնիմ: Պապիկս մասնակցել է պատերազմներին՝ 44-օրյային, ապրիլյան պատերազմին, ու ինքը առանց մի վայրկյան մտածելու գնացել է սահման, որպեսզի մեր զինվորները մենակ չզգան իրենց: Ես միշտ ուզեցել եմ պապիկիս պես էղնիմ։ Պապս չի խնայել իրա կյանքը հանուն հայրենիքի, ես գուզեմ, օր նույն ձևի էլ ես էղնիմ»:

Նորակոչիկ Արարատ Տոնոյանի պապն էլ զոհվել է Արցախյան առաջին պատերազմում: 18- ամյա երիտասարդը հայրենիքը պաշտպանելը սուրբ գործ է համարում: Պատասխանատվության մեծ զգացումով եմ մեկնում բանակ՝ ասում է Արարատը:

«Շատ մեծ ոգևորությամբ կերթամ՝ հայրենիքս պաշտպանելու համար: Իմ անունս պապիկիս անունն է։ Առաջին պատերազմում է զոհվել Արցախյան, ու կերթամ իրա գործը շարունակելու, մեր հայրենիքը պաշտպանելու, որ իմ ընտանիքս էլ հանգիստ քնի»:

Նորակոչիկներն ասում են, որ գիտակցում են ծառայության դժվարությունները։ Սլավիկ Իվանյանը մանկուց է ականատես եղել, թե ինչպես են իր երկու զինվորական հորեղբայրները հաղթահարել սպայական կյանքի  դժվարությունները։ Սլավիկի ցանկությունը մեկն է՝ լինել այնպիսի զինվոր, որ հորեղբայրների պատիվը բարձր պահի  բանակում:

«Մենք հինգ ընկերներով ենք զորակոչվում բանակ, տրամադրությունը լավ է: Իմ հոպարներս զինվորական են ու ես պտի լավ ծառայեմ, որ իրանց պատիվը բարձր պահեմ։ Գուզեմ, օր Հայաստանի համար լավ զինվոր էղնիմ, հայկական բանակի համար: Ես, որպես զինվոր, ամեն ինչի էլ պատրաստ եմ հանուն իմ հայրենիքի, հանուն իմ ծնողների: Ես գիտեմ, որ իմ հետևս իմ ծնողներս են, ես ամեն ինչի էլ պատրաստ եմ»։

Նորակոչիկներն ուրախ են, որ 2026 թվականի ձմեռային զորակոչից սկսած կրճատվել է պարտադիր զինվորական ծառայության ժամկետը: Նախկին երկու տարվա փոխարեն ժամկետայիններն այսուհետև կծառայեն 1.5 տարի: