Mellon Blue երկնագույն ադամանդը 25,6 միլիոն դոլարով աճուրդով վաճառվել է Ժնևում

Mellon Blue հազվագյուտ երկնագույն ադամանդը՝ 9,51 կարատ քաշով, Ժնևում վաճառվել է 20,5 միլիոն շվեյցարական ֆրանկով (25,6 միլիոն դոլար)։ Ադամանդն ավելի վաղ պատկանել է ամերիկացի բարերար Ռեյչել Մելոնին, որը նաև ԱՄՆ նախկին առաջին տիկին Ժակլին Քենեդիի մտերիմ ընկերուհին էր։ «Արմենպրես»-ի փոխանցմամբ՝ այս մասին հաղորդել է Christie's աճուրդի տունը։

Հագեցած գույնի շնորհիվ Mellon Blue-ն դասվել է վառ, ֆանտաստիկ ադամանդների հազվագյուտ կատեգորիային, որի մեջ է մտնում բոլոր հազվագյուտ կապույտ ադամանդների 1%-ից պակաս մասը։ Բացի այդ, քարը զերծ է ներքին թերություններից։

Ժնևի Christie's աճուրդի տան ոսկերչական իրերի բաժնի ղեկավար Մաքս Ֆոսեթի խոսքով՝ այդ քարը համարվում է «շուկայում երբևէ հայտնված ամենագեղեցիկ գունավոր քարերից մեկը»։

Ադամանդն առաջին անգամ աճուրդի է հանվել Մելոնի մահից հետո՝ 2014 թվականին, և վաճառվել է ռեկորդային 32,6 միլիոն դոլարով։ Նոր սեփականատերը վերանորոգել է քարը՝ դրա թափանցիկությունը բարելավելու համար։ Դրա հետևանքով քարը կորցրել է իր սկզբնական 9,75 կարատ քաշը և կախազարդից վերածվել մատանու: