Քննադատները քարկոծել են Քիմ Քարդաշյանի խաղը «All's Fair» նոր սերիալում

Քիմ Քարդաշյանը կրկին հայտնվել է ուշադրության կենտրոնում, այս անգամ՝ իր դերասանական խաղի քննադատության պատճառով։ Ռայան Մերֆիի նոր «All's Fair» սերիալում, որի պրեմիերան տեղի է ունեցել Hulu-ում նոյեմբերի 4-ին, Քարդաշյանը խաղում է ամուսնալուծության վերաբերյալ իրավաբանական ընկերության սեփականատիրոջ դերը, որն աշխատում է բացառապես կին հաճախորդների հետ։

Չնայած այնպիսի հայտնի դերասանների, ինչպիսիք են Գլեն Քլոուզը, Նաոմի Ուոթսը, Սառա Փոլսոնը, Նիսի Նեշը և Թայանա Թեյլորը, քննադատները քարը քարի վրա չեն թողել շոուն, մասնավորապես՝ Քարդաշյանի խաղը։

Սերիալի մասին կարևորագույն փաստերը

Առաջին երեք սերիաները արդեն հասանելի են Hulu-ում, իսկ նոր սերիաները թողարկվում են շաբաթական երեքշաբթի օրերին,

Քարդաշյանը և նրա մայրը՝ Քրիս Ջենները, նախագծի գործադիր պրոդյուսերներն են,

Քիմի կերպարը ոգեշնչված է հայտնիների ամուսնալուծությունների փաստաբան Լորա Վասերից, որը ներկայացրել է Քարդաշյանին Քանյե Ուեսթից և Քրիս Համֆրիսից ամուսնալուծությունների ժամանակ,

Սերիալը Rotten Tomatoes-ում ունի 0% վարկանիշ և Metacritic-ում՝ 11%, ինչը թարգմանաբար նշանակում է «գրեթե լիակատար քննադատական մերժում»։

Քննադատների քննադատությունը

The Guardian. Լյուսի Մանգանը շոուին տվել է զրոյական վարկանիշ՝ այն անվանելով «գոյության առումով սարսափելի»։ Քարդաշյանի խաղը, նրա խոսքով, «անկենդան և անօգուտ» էր։ Այնուամենայնիվ, նա նշել է, որ մյուս դերասանները նույնպես դժվարանում էին, և ընդհանուր առմամբ, թվում էր, թե ոչ ոք չգիտեր, թե ինչպես խաղա իր դերը։

The Telegraph. Էդ Փաուերը սերիալին տվել է մեկ աստղ և անվանել այն «հեռուստատեսության դեմ ուղղված հանցագործություն»։ Նրա կարծիքով Քարդաշյանը «չունի խարզիմա և էկրանային ներկայություն», բայց ընդհանուր առմամբ բոլորի խաղը «սարսափելի» էր։

The Hollywood Reporter. Էնջի Հանը Քիմի խաղը նկարագրել է որպես «կոշտ և անհոգի, առանց որևէ իսկական պահի»։ Նա նաև նշել է երկխոսությունների հետ կապված խնդիրները, որոնք կամ ձանձրալի էին, կամ չափազանց վուլգար։

USA Today. Քելլի Լոուլերը «All's Fair»-ը անվանել է «տարվա ամենավատ շոուն»՝ ընդգծելով, որ երկխոսությունները ավելի վատն էին, քան ChatGPT-ի կողմից երկու տարի առաջ ստեղծված սցենարները, իսկ դերասանական խաղը՝ ավելի վատ, քան ավագ դպրոցի Սուրբ Ծննդյան պիեսը։ Նա ավելացրել է, որ «Քարդաշյանի միապաղաղ խաղը նրան իրավունք չի տալիս իրեն դերասանուհի անվանել»։

Ռայան Մերֆին նախկինում համագործակցել է Քարդաշյանի հետ «American Horror Story: Delicate» հաղորդման ժամանակ, որտեղ նրա խաղը դրական արձագանքներ էր ստացել, և սերիալը Rotten Tomatoes-ում ստացել էր 77% գնահատական։ Քննադատները նշել են, որ Քիմը հմտորեն օգտագործել է «աղջկական» տրամադրություն՝ ստեղծելով Հոլիվուդի PR մասնագետի գրավիչ կերպար։

Մերֆին հայտնի է որպես ամենաարդյունավետ հեռուստատեսային պրոդյուսերներից մեկը, ստեղծելով այնպիսի սերիալներ, ինչպիսիք են «Glee»-ն, «American Horror Story»-ն, «9-1-1»-ը և «Pose»-ը, որոնց համար նա արժանացել է բազմաթիվ «Էմմի» մրցանակների: Սակայն նրա նախագծերի վերաբերյալ քննադատական ակնարկները մեծապես տարբերվում են. որոշ սերիալներ գովասանքի են արժանանում, մինչդեռ մյուսները խիստ քննադատության են ենթարկվում, հատկապես, երբ խոսքը վերաբերում է իրական իրադարձությունների վրա հիմնված սերիալներին: