51-ամյա բրիտանացին, 19-րդ անգամ բարձրանալով Էվերեստ, ոչ պրոֆեսիոնալների շրջանում համաշխարհային ռեկորդ է սահմանել

Անգլիայի հարավ-արևմուտքի 51-ամյա բնակիչ Քենթոն Քուլը կիրակի օրը մի քանի այլ լեռնագնացների հետ միասին բարձրացել է 8849 մետր բարձրությամբ գագաթը։

Քուլն առաջին անգամ Էվերեստ է բարձրացել 2004 թվականին և այդ ժամանակից ի վեր դա անում է գրեթե ամեն տարի։

Նա չի կարողացել բարձրանալ Էվերեստ 2014 թվականին, քանի որ սեզոնը չեղարկվել էր ձնահյուսի հետևանքով 16 շերպա ուղեկցորդների մահից հետո, և ևս մեկ անգամ 2015 թվականին, երբ երկրաշարժը ձնահյուս էր առաջացրել, որը 19 մարդու կյանք խլեց։ 2020 թվականի վերելքների սեզոնը չեղարկվել էր կորոնավիրուսի համավարակի պատճառով։

Հարյուրավոր լեռնագնացներ և նրանց ուղեկցորդները գտնվում են լեռան վրա գարնանային վերելքների հայտնի սեզոնի ընթացքում՝ հույս ունենալով նվաճել աշխարհի ամենաբարձր գագաթը։

Նրանցից շատերին դա արդեն հաջողվել է, բայց սպասվում է, որ էլ ավելի շատ մարդիկ կփորձեն մինչև այս ամսվա վերջ վերելքների սեզոնի փակումը, երբ եղանակային պայմանները կվատանան մուսոնային անձրևների սեզոնի սկսվելուն պես, որոնք դժվարացնում են վերելքը։

Միայն նեպալցի շերպա ուղեկցորդներն են Քուլից ավելի հաճախ բարձրացել գագաթ։

Էվերեստի գագաթ ամենաշատը՝ 30 անգամ, բարձրացել է նեպալցի շերպա ուղեկցորդ Քամի Ռիտան, որը ներկայումս նույնպես գտնվում է լեռան վրա և, ինչպես սպասվում է, առաջիկա մի քանի օրերին հերթական անգամ կնվաճի գագաթը։