Ճապոնիայի խոշորագույն բանկի աշխատակիցը հաճախորդների պահատուփերից գողացել է ավելի քան 6,6 մլն դոլար

Ճապոնիայի խոշորագույն բանկը երկուշաբթի ներողություն է խնդրել աշխատակցի՝ հաճախորդների պահատուփերից ենթադրաբար ավելի քան 1 միլիարդ իեն ​​(6,6 միլիոն դոլար) գողանալու համար, հաղորդում է Associated Press-ը:

Բանկը, որը պաշտոնապես հայտնի է որպես Mitsubishi UFJ Financial Group, Inc. (MUFG), երկուշաբթի հայտարարել է, որ հետաքննություն է իրականացնում:

Ըստ բանկի հաղորդագրության՝ փոխհատուցման հարցը կլուծվի։ Գողությունները տեղի են ունեցել Տոկիոյի բանկի երկու մասնաճյուղում՝ 2020 թվականի ապրիլից մինչև այս տարվա հոկտեմբերի վերջ, երբ բացահայտվեց խնդիրը։

MUFG-ի նախագահ և գործադիր տնօրեն Ջունիչի Հանզավան լրագրողներին ասել է, թե պահատուփերի և դրանց բանալիների պահպանման համար պատասխանատու աշխատակցուհին կասկածվում է իր դիրքն օգտագործելով կանխիկ գումար և այլ թանկարժեք իրեր գողանալու համար:

MUFG-ում հայտարարել են, թե աշխատակիցը խոստովանել է, որ գումարը վերցրել և օգտագործել է ներդրումների և իր անձնական նպատակների համար: Նա հեռացվել է աշխատանքից և համագործակցել է բանկի ներքին վերանայման և ոստիկանական հետաքննության հետ, սակայն դեռ չի ձերբակալվել: Գողությունների մասին լուրերի տարածվելուց ի վեր տասնյակ մարդիկ պնդում են ենթադրյալ կորուստների մասին, որոնք բանկը փորձում է ճշտել:

MUFG-ի գործը ճապոնական խոշոր ֆինանսական հաստատությունում հանցավոր գործունեության՝ վերջին ժամանակներում երկրորդ դեպքն է: Նոյեմբերին էլ Nomura Holdings-ը խոստովանեց, որ նախկին աշխատակիցը ձերբակալվել է Հիրոսիմայում կողոպուտի, սպանության փորձի և հաճախորդի հրկիզման կասկածանքով։