ԱՄՆ-ն Ուկրաինային ռազմական օգնության «պլան Բ» չունի. Bloomberg

ԱՄՆ-ն Ուկրաինային ռազմական օգնության «պլան Բ» չունի, բացառությամբ 60 միլիարդ դոլարի, որը չի կարող հատկացվել Կոնգրեսում տարաձայնությունների պատճառով։ Այս մասին գրում է Bloomberg-ը՝ ամերիկացի պաշտոնյաներին հղումով։

Ըստ հրատարակության զրուցակիցների՝ ԱՄՆ նախագահ Ջո Բայդենի վարչակազմը գնալով հիասթափվում է ինչպես Կոնգրեսում հանրապետականներից՝ Ուկրաինային օգնության ձգձգման պատճառով, այնպես էլ Եվրոպայում դաշնակիցներից, որոնք, ըստ Սպիտակ տան, Կիևին օգնելու համար պետք է օգտագործեն Ռուսական սառեցված ակտիվներիշահույթը։

Ամերիկացի պաշտոնյաներից մեկը նաև նշել է, որ եվրոպական երկրները պետք է շտապ արձագանքեն Ուկրաինայի խնդրանքին և երկրին իրենց պաշարներից ավելի շատ Patriot հակաօդային պաշտպանության համակարգեր տրամադրեն։

Մարտի 20-ին ԱՄՆ Ազգային անվտանգության հարցերով խորհրդական Ջեյք Սալիվանը, չհայտարարված այցով ժամանելով Կիև, ասաց, որ Ուկրաինային ռազմական օգնության օրինագիծը, որը կասեցված է Ներկայացուցիչների պալատում, երկկուսակցական հավանություն կստանա: Սակայն նա չի կանխատեսել, թե երբ դա տեղի կունենա։ «Ինչպես ասացի, ես վստահ եմ, որ մենք կարող ենք ուժեղ երկկուսակցական աջակցություն ստանալ, երբ Ներկայացուցիչների պալատը քվեարկի Ուկրաինայի օգնության փաթեթին: Այնպես որ, ես չեմ կարծում, որ մենք այսօր պետք է խոսենք պլան Բ-ի մասին», - ասել է Սալիվանը:

ԱՄՆ Կոնգրեսը չի կարողանում հաստատել 61 միլիարդ դոլարի ռազմական օգնությունն Ուկրաինային անցյալ տարվա աշնանից՝ հանրապետականների և դեմոկրատների միջև տարաձայնությունների պատճառով։