Պակիստանի նախարարները հրաժարվել են աշխատավարձ ստանալ պետական ծասխերը խնայելու համար. ԶԼՄ
Պակիստանի վարչապետ Շահբազ Շարիֆը եւ դաշնային կառավարության նախարարներն ինքնակամ հրաժարվել են աշխատավարձ ստանալ խնայողության կոշտ միջոցների շրջանակում, որոնք ուղղված են պետական ծախսերի կրճատմանը։ Այս մասին տեղեկացրել է Pakistan Today թերթը։
Այս շաբաթ ավելի վաղ Պակիստանի նախագահ Ասիֆ Ալի Զարդարին եւս հրաժարվել էր աշխատավարձից եւ արտոնություններից՝ հայտարարելով, որ «որոշել է ազգային գանձարանը չծանրաբեռնել պետությունից կատարվող վճարներով»։
Պետական ծախսերի խնայման միջոցներ մտցնելը Պակիստանի նոր դաշնային կառավարության առաջին քայլերից մեկն է, որը ձեւավորվել է փետրվարին կայացած խորհրդարանական ընտրություններից հետո։ Այն գլխավորում է Շարիֆը։
Երկուշաբթի կառավարությունը պետական ծախսերի խնայողության նպատակով սահմանափակել է նախարարների եւ պետական պաշտոնյաների արտասահմանյան ուղեւորությունները, ինչպես նաեւ արտասահմանում նրանց գտնվելու նոր կանոններ է մտցրել։ Այսուհետ դաշնային եւ պետական նախարարները, նրանց խորհրդականները եւ օգնականները պարտավոր են արտասահման մեկնել տարեկան 3 անգամից ոչ ավելի եւ միայն կառավարական կոմիտեի թույլտվությամբ, ինչն ապահովելու է ազգային բյուջեի խնայողությունը։ Արտասահմանյան ուղեւորություններում նրանց արգելվում է մնալ հինգ աստղանի հյուրանոցներում։ Պակիստանի արտասահմանյան դեսպանություններին խորհուրդ է տրվում որքան հնարավոր է ավելի լայն գործադրել դիվանագետներին միջազգային համաժողովներում եւ միջոցառումներում, ինչը պետք է նպաստի դրանց մասնակցության համար նախարարների եւ պաշտոնյաների ուղեւորության կրճատմանը։