Սեղանին են դրված մեր պետության հետագան պայմանավորող հարցեր. Գոռ Գևորգյան

Միջազգայնագետ, արևելագետ Գոռ Գևորգյանը Երևանի ավագանու ընտրություններին կմասնակցի «Ապրելու երկիր» կուսակցության նախընտրական ցուցակով, գրում է 168.am-ը։

2020 թվականին «Իմ քայլը» խմբակցությունը լքած Գևորգյանի փոխանցմամբ՝ որոշակի դադարից հետո այժմ քաղաքական գործընթացներին մասնակցելու որոշում կայացրեց, քանզի հենց մայաքաղաքում է որոշվելու հայկական պետության ռազմավարական ապագան։

«Երևանի ավագանու ընտրությունները հիմք են հանդիսանալու արտահերթ խորհրդարանական ընտրությունների՝ մեկ կամ երկու տարի հետո»,- ասաց Գևորգյանը՝ շեշտելով, որ իր համար առաջնային է Արցախի խնդիրն ու անվտանգային միջավայրի վերականգնումը, ինչից ելնելով էլ հանդիսանում է մի կուսակցության ավագանու թեկնածու, որն իր կուսակցական մանիֆեստով պաշտպանում է Արցախի ինքնորոշման իրավունքը։

 «Սեղանին դրված են շատ ավելի լուրջ հարցեր, որոնցով պայմանավորված են պետության հետագան և Արցախի շուրջ անելիքները»,- ասաց Գևորգյանը՝ ընդգծելով՝ Երևանի ավագանու ընտրություններին մասնակցում է՝ մաս կազմելու և փոխելու համար, հակառակ դեպքում կստացվի, որ ոչինչ չի անում հանուն Արցախի։

«Հակառակ դեպքում, մենք տեղից չենք շարժվի. ամենահեշտը ոչինչ չանելն է»,- ասաց Գևորգյանը՝ անընդունելի համարելով Արցախում ստեղծված իրավիճակին զուգընթաց ոչինչ չանելը՝ հատկապես, երբ Հայաստանի իշխանությունն Արցախի հարցում որդեգրել է 3-րդ դեմքի կարգավիճակ։

«Մինչդեռ, եթե Արցախը դառնա Ադրբեջանի համար գործոն, դրանից հետո գալու է Սյունիքի հերթը։ Դժվար է ասել, թե ինչպե՞ս է գալու, բայց գալու է։ Հայաստանի Հանրապետությունը խոցելի վիճակում է հիմա, իսկ դրա պատասխանատուն օրվա իշխանությունն է, որը պետք է ամեն ինչ անի՝ պատերազմի վերսկսում թույլ չտալու համար»,- ասաց մեր զրուցակիցը։

Հարցազրույցի մանրամասները՝ տեսանյութում։