Եռակողմ բանակցությունները կկայանան նոյեմբերի 10-11-ին․ Սթիվ Ուիթքոֆ

Ռուսաստանի, Ուկրաինայի և ԱՄՆ-ի միջև բանակցությունները կկայանան Աբու Դաբիում նոյեմբերի 10-11-ը։ Բանակցությունների անցկացման ժամանակն ու վայրը X սոցիալական ցանցում հայտնել է ԱՄՆ նախագահի հատուկ բանագնաց Սթիվ Ուիթքոֆը։ Նրա խոսքով՝ հանդիպումը նվիրված է լինելու «հետպատերազմյան անվտանգության միջոցառումներին, դեէսկալացիային, հումանիտար ջանքերին և դեպի խաղաղություն տանող հաջորդ քայլերին»։

Սպասվում է, որ այս շաբաթ ամերիկացի բանակցողները Բրյուսելում կհանդիպեն Ֆրանսիայի, Գերմանիայի, Մեծ Բրիտանիայի, ԵՄ-ի և ՆԱՏՕ-ի ներկայացուցիչների հետ՝ քննարկելու Ուկրաինայի անվտանգության երաշխիքները, Եվրոպայի հետպատերազմյան անվտանգության ճարտարապետությունը և Ուկրաինայի վերականգնմանն աջակցելու տնտեսական հնարավորությունները, նշել է Ուիթքոֆը։

«Մենք անհամբերությամբ սպասում ենք Կիևում, Օսլոյում և Սանկտ Պետերբուրգում ձեռք բերված առաջընթացը զարգացնելու հնարավորությանը՝ դեպի համապարփակ և տևական խաղաղության համաձայնագիր, որը կապահովի երկարաժամկետ անվտանգություն ապագա սերունդների համար», — գրել է Դոնալդ Թրամփի հատուկ բանագնացը։

Ուիթքոֆը հոկտեմբերին Օսլոյում հանդիպել էր Ուկրաինայի նախագահ Վլադիմիր Զելենսկու հետ, իսկ դրանից հետո մեկնել էր Սանկտ Պետերբուրգ՝ Ռուսաստանի նախագահ Վլադիմիր Պուտինի հետ բանակցությունների համար։

Ռուսաստանի և Ուկրաինայի միջև ԱՄՆ-ի միջնորդությամբ վերջին բանակցությունները տեղի են ունեցել այս տարվա փետրվարին։