Այսուհետ ինձ ավելի հաճախ կտեսնեք տարբեր հարթակներում. ԱԱԾ նախկին տնօրեն

Հրապարակայնության բացակայությունը չի խանգարում հասարակական-քաղաքական գործունեությանը, այսուհետ ինձ եւ գործընկերներիս ավելի հաճախ կտեսնեք տարբեր միջոցառումներում եւ տարբեր հարթակներում։ Այս մասին լրագրողների հետ զրույցում փետրվարի 20-ին ասել է «Հայրենիք» կուսակցության նախագահ, Հայաստանի Ազգային անվտանգության ծառայության նախկին տնօրեն Արթուր Վանեցյանը։

Նա նշել է, որ զբաղվում է կուսակցության հարցերով, հանդիպում մարդկանց հետ, եւ նորից կրկնել է, որ պատգամավորական մանդատը չի համարում այն գործիքը, որը կարող է օգնել արդյունավետ պայքարելու իշխանության դեմ եւ ծառայելու հայրենիքին։

Վանեցյանը կոչ է արել բոլոր ուժերին եւ քաղաքացիներին միավորվել մեկ գաղափարի շուրջ եւ դուրս գալ ներկա վիճակից։ Նրա պատկերավոր արտահայտմամբ՝ միայն խելագարը կարող է դեմ լինել խաղաղությանն ու խաղաղության պայմանագրի ստորագրմանը։ «Բայց մենք պետք է հասկանանք, թե ինչ գին ենք վճարում դրա համար. արդյո՞ք Հայաստանը եւ Արցախը գոյություն կունենան, կկարողանա՞ն արդյոք հայերն ապրել անվտանգ ու անկախ իրենց հայրենիքում։ Հայաստանն ասում է, որ արդեն մշակել է խաղաղության պայմանագրի իր տարբերակն ու հանձնել Բաքվին։ Իսկ ի՞նչ է գրված դրանում։ Ոչ ոք այդ մասին ոչինչ չգիտի»,- նշել է ԱԱԾ նախկին տնօրենը։

Ընդդիմադիր գործչի գնահատմամբ՝ Հայաստանի այսպես կոչված իշխանությունները մշտապես ստորագրել եւ հակահայկական փաստաթղթեր, դիմել հակահայկական քայլերի, չեն պաշտպանել ստորագրված փաստաթղթերի դրույթները, այլ վկայակոչել են լրացուցիչ բանավոր պայմանավորվածությունները։

Նա իրեն անվանել է խաղաղության կողմնակից, բայց խաղաղության պայմանագրի կետերը, նրա համոզմամբ, պետք է հրապարակվեն։ «Հակահայկական խաղաղության պայմանագրի ստորագրումը կարելի է կանխել հանրային կարծիք ձեւավորող մարդկանց խոսքի միջոցով։ Մենք ոչ իշխանություն ենք, ոչ զինված խումբ եւ ոչ էլ ահաբեկիչներ, մենք պետք է խոսենք հասարակության հետ, մարդկանց ներկայացնենք սպառնալիքներն ու փորձենք միասին կանխել այդ փաստաթղթի հնարավոր ստորագրումը։ Մենք հասել ենք այն կետին, որ չենք կարող հերթական անգամ որեւէ բան պլանավորել։ Մենք պետք է հասկանանք, որ սպառնալիքի տակ են Հայաստանը, Արցախը, հայ ժողովրդի ապագան»,- ընդգծել է քաղաքական գործիչը։

Նա կոչ է արել գործել արագ՝ հավաստիացնելով, որ կանի ամեն ինչ՝ սկսած 2019թ. սեպտեմբերից, երբ հրաժարական տվեց եւ հանդես եկավ հայտարարությամբ։ «Այն ժամանակ ոչ մեկի մտքով անգամ չէր կարող անցնել, թե ուր է գլորվում երկիրը։ Բայց ես այդ մասին ասում էի եւ միշտ եմ ասում։ Հայաստանի իշխանությունները հասարակությունում բաժանարար գծեր են մտցրել, բաժանել են հասարակությունը «սեւերի» ու «սպիտակների», յուրայինների եւ հակառակորդների, արեւմտամետների ու ռուսամետների։ Դա Նիկոլ Փաշինյանին թույլ է տալիս պահպանել իր անձնական իշխանությունը։ Նա գործում է հենց այդ բնազդի ազդեցության տակ»,- ամփոփել է Արթուր Վանեցյանը։