Մոսկվան դեմ չէ Երևանի ու Բաքվի միջև Թբիլիսիի միջնորդությանը, եթե դրա ետևում Վաշինգտոնն ու Բրյուսելը չեն․ Զախարովա

«Կողմ ենք ցանկացած ձևաչափի, որը կարող է ամրապնդել ռեգիոնի անվտանգությունն ու կայունությունը»,- այս մասին այսօր ամենշաբաթյա բրիֆինգի ժամանակ ասաց ՌԴ ԱԳՆ պաշտոնական ներկայացուցիչ Մարիա Զախարովան՝ հայտնելով ՌԴ ԱԳՆ դիրքորոշումը Երևան-Թբիլիսի-Բաքու հնարավոր պլատֆորմի վերաբերյալ։

Զախարովայի խոսքով՝ իրենք ելնում են նրանից, որ յուրաքանչյուր երկիր ազատ է մասնակցել այն միջազգային ձևաչափերին, որոնք համապատասխանում են երկրի շահերին ու որոնք ուղղված չեն երրորդ երկրների դեմ, որոնք հաշվի են առնում ներկայումս առկա ուժային հավասարակշռությունը։

Ըստ նրա, եթե եռակողմ՝ Երևան-Թբիլիսի-Բաքու երկխոսությունը նպաստի Կովկասում տարաձայնությունների հաղթահարմանը, կայունության ու անվտանգության ամրապնդմանը, ապա ՌԴ-ն այն կարող է միայն ողջունել։

«Իսկ եթե այս նախաձեռնության ետևում են Վաշինգտոնի ու Բրյուսելի կոնտուրները, որոնք ձգտում են տապալել Հայաստանի, Ադրբեջանի ու Ռուսաստանի ղեկավարների պայմանավորվածությունները, ապա դա լիովին այլ պատմություն է»,- ասաց Զախարովան։