Հարավային Կորեայի նախագահը ներում է շնորհել Samsung Electronics-ի փոխնախագահին

Հարավային Կորեայի նախագահ Յուն Սուկ Յոլը ներում է շնորհել Samsung Electronics-ի փոխնախագահ Ջեյ Յ. Լիին։ Հարավային Կորեայի արդարադատության նախարարությունը հայտարարել է, որ բիզնես-ղեկավարն անհրաժեշտ է «ազգային տնտեսական ճգնաժամի» հաղթահարման համար, տեղեկացրել է Reuters-ը։

Ներումը հիմնականում խորհրդանշական բնույթ է կրում. Լին արդեն պայմանական ժամկետից շուտ ազատ էր արձակվել՝ կաշառակերության պատճառով բանտում 18 ամիս նստելուց հետո։ Ներումը պետք է նշանակի, որ Լին կկարողանա ավելի ազատ կերպով վարել բիզնեսը։

«Ազգային տնտեսական ճգնաժամն անհապաղ հաղթահարելու անհրաժեշտության հետ կապված՝ մենք ընտրել ենք տնտեսական առաջնորդների, որոնք գլխավորում են ազգային աճի շարժիչ ուժը տեխնոլոգիաներում ակտիվ ներդրումների եւ աշխատատեղերի ստեղծման ոլորտում, եւ որոնք ներման կարժանանան»,- ճեպազրույցում ասել է արդարադատության նախարար Հան Դոն Հունը։

Լին Samsung-ի հիմնադիրների ընտանիքից է, նա ողջունել է այս որոշումը եւ խոստացել ջանադրաբար աշխատել ի բարօրություն ազգային տնտեսության։

Նախագահը ներում է շնորհել նաեւ Lotte Group-ի նախագահ Շին Դոն Բինին, որը դատապարտվել էր երկուսուկես տարվա բանտարկության կաշառակերության պատճառով։