JP Morgan-ը եվրոգոտում ռեցեսիա է կանխատեսում՝ գազի ճգնաժամի մոտենալուն զուգընթաց

Եվրոգոտում գազային ճգնաժամը, Իտալիայում նոր քաղաքական խնդիրների հետ մեկտեղ, մինչեւ հաջորդ տարվա սկիզբը դաշինքին կմղի դեպի չափավոր ռեցեսիա եւ կսահմանափակի Եվրոպական կենտրոնական բանկի տոկոսադրույքի բարձրացումը, նախազգուշացրել է JPMorgan-ը:

Բանկի տնտեսագետները նվազեցրել են իրենց տնտեսական կանխատեսումները՝ կանխագուշակելով, որ եվրոգոտու ՀՆԱ-ի աճը այս եռամսյակում կդանդաղի մինչեւ 0,5 տոկոս, այնուհետեւ կկրճատվի 0,5 տոկոսով ինչպես այս տարվա չորրորդ, այնպես էլ հաջորդ տարվա առաջին եռամսյակում: Երկու անընդմեջ եռամսյակ կրճատումը ռեցեսիայի ավանդական սահմանումն է, հայտնում է Reuters-ը։

«Մեր նոր կանխատեսումները գազի գինը ենթադրում են 150 եվրո/ՄՎտժ մակարդակում»,- հայտարարել է բանկը՝ հավելելով, որ Իտալիայում լարվածության հետ մեկտեղ եվրոգոտու ՀՆԱ-ին 2 տոկոսի հարված կհասնի։

Գազի բարձր գները նաեւ մոտ ապագայում կհրահրեն ընդհանուր գնաճ՝ մինչեւ 1,2 տոկոսային կետ, թեեւ հաջորդ տարի այն կրկին կնվազի տնտեսության բացասական արձագանքի պատճառով եւ այդպիսով կնվազեցնի ԵԿԲ-ի տոկոսադրույքների բարձրացման տեմպերը:

«Մենք ակնկալում ենք, որ ԵԿԲ-ն մինչեւ տարեվերջ կբարձրացնի տոկոսադրույքները եւս 50 բազիսային կետով»,- նշել է JPMorgan-ը:

«Ավելի մեծ մարտահրավերը վերաբերում է 2024 թվականին եւ դրանից հետո»,- հայտարարել է JPMorgan-ը: «ՀՆԱ-ի մակարդակը ավելի ցածր կլինի, իսկ գործազրկությունը՝ ավելի բարձր, ինչը վկայում է դեզինֆլյացիոն թափի մասին»: