Հնդկաստանում ապօրինի ալկոհոլի պատճառով ավելի քան 20 մարդ է մահացել

Առնվազն 21 մարդ մահացել է, եւս 30-ը հիվանդացել է Հնդկաստանի արեւմտյան հատվածում մոդիֆիկացված ալկոհոլի օգտագործումից, հայտնել են պաշտոնական աղբյուրները:

Մահվան դեպքերը գրանցվել են Գուջարաթ նահանգի Ահմեդաբադ եւ Բոտադ շրջաններում, որտեղ ալկոհոլային խմիչքների արտադրությունը, վաճառքը եւ օգտագործումն արգելված է:

Press Trust of India լրատվական գործակալությունը հայտնել է, որ ոստիկանությունը ձերբակալել է ալկոհոլի վաճառքով զբաղվող մի քանի կասկածյալի։
Ապօրինի ոգելից խմիչքները չափազանց եկամտաբեր արդյունաբերություն են դարձել ամբողջ Հնդկաստանում, որտեղ դրանց արտադրողները ոչ մի հարկ չեն վճարում եւ իրենց արտադրանքը հսկայական քանակությամբ ցածր գնով վաճառում են աղքատներին:

2020-ին Հնդկաստանի հյուսիսային Փենջաբ նահանգում այդպիսի ալկոհոլ օգտագործումից առնվազն 120 մարդ էր մահացել: