Ուկրաինային մատակարարվող զենքը հայտնվում է սև շուկաներում. Եվրոպոլ

Քրեական ցանցերը զբաղվում են Եվրամիության երկրներ Ուկրաինայից հայտնվող «մեծ քանակությամբ հրազենի եւ զինամթերքի» մաքսանենգությամբ։ Այս մասին նշվել է  Եվրամիության ոստիկանական ծառայության (Եվրոպոլ) գաղտնի զեկույցում, որն ուղարկվել է ԵՄ-ի Խորհրդին, տեղեկացրել է գերմանական SWR հասարակական-իրավական մեդիա-ընկերությունը։

Զեկույցը տեղեկություն է պարունակում Ուկրաինայում պատերազմի հետեւանքների եւ Եվրամիության համար ահաբեկչական սպառնալիքների մասին։

Ըստ այդ տվյալների՝ իրավապահներին հայտնի են մի շարք դեպքեր, երբ առանձին անձինք փորձել են հեռանալ Ուկրաինայից հրազենային զենքով։

Ոստիկանական ծառայությունը նաեւ ենթադրում է, որ ԵՄ-ի հետ ուկրաինական սահմանի երկայնքով ստեղծվել են գաղտնարաններ մաքսանենգության կազմակերպման
համար, տեղեկացրել է DW-ն։

Եվրոպոլի տեղեկացմամբ՝ փախստականներ ընդունած երկրների մի մասը մտավախություն ունի, որ նրանց մի մասը հրազեն ունի ինքնապաշտպանության համար։

Ոստիկանությունում նաեւ կասկածում են, որ ուկրաինացիների մի մասը զենքն անցկացրել է սահմանով՝ վաճառելու կամ ապրանքներով ու ծառայություններով փոխանակելու համար։ Տեղեկացվել է դեպքերի մասին, երբ զենքով «վճարել» են տաքսով երթեւեկելու համար։

Եվրոպոլի ներկայացուցիչ Յան Օպ Գեն Օորտը dpa գործակալությանը տեղեկացրել է, որ գրանցվել են սեւ շուկայում հրազենի վաճառքի դեպքեր։ ԵՄ-ի առանձին երկրների իրավապահ մարմիններում չեն բացառում նաեւ ծանր զենքի վաճառքը։ «Դրանք կարող են հայտնվել հանցավոր խմբավորումների կամ ահաբեկիչների ձեռքում»,- նշել է Եվրոպոլի ներկայացուցիչը։

Դարքնեթում վաճառքի է հանվել բրիտանական Javelin շարժական զենիթահրթիռային համալիր։ Եվրոպոլը չի բացառում, որ նման առաջարկները կարող են լինել «ռուսական քարոզչության մաս՝ նպատակ ունենալով բացասական վերաբերմունք ստեղծել արեւմտյան զենքի մատակարարման հանդեպ»։

Եվրախորհրդարանի գերմանացի պատգամավոր Յոզլեմ Դեմիրելը (Özlem Demirel)
երկյուղներ է հայտնել, որ բունդեսվերի կողմից Ուկրաինա մատակարարվող զենքը
նույնպես կարող էր հայտնվել ԵՄ-ում կամ սեւ շուկայում։ «Միություն-60/կանաչների» փոխնախագահ Կոնստանտին ֆոն Նոցը (Konstantin von Notz) կարծիք է հայտնել, որ անհրաժեշտ է վերահսկողություն մտցնել զենքի մաքսանենգությունը կանխելու նպատակով։