Ֆրանսիայում գրանցվել է պարենային ապրանքների անբավարարության կտրուկ աճ. Figaro
Վերջին մեկ տարում պարենային ապրանքների անբավարարությունը ֆրանսիական սուպերմարքետներում խիստ աճել է։ Այս մասին են վկայում NielsenIQ վերլուծաբանական ընկերության տվյալները, որոնք երկուշաբթի մեջբերել է Le Figaro պարբերականը։
Հաղորդվում է, որ մայիսի 23-ից մինչեւ հունիսի 19-ը խանութներում բոլոր տեսակի պարենային մթերքների անբավարարությունը հասել է 5,5 տոկոսի, որը 1,2 տոկոսով ավելին է 2021թ. նույն ժամանակահատվածի համեմատ։
«Կլիմայական պայմանները, աղքատ բերքը, հակամարտությունն Ուկրաինայի եւ ՌԴ-ի
միջեւ եւ արտադրական այլ դժվարություններ տարեսկզբից զգալիորեն ավելացրել են որոշակի մթերքների անբավարարությունը եւ բացասական ազդեցություն թողել
խանութներում դրանց հասանելիության հարցում»,- պարբերականը մեջբերել է NielsenIQ-ի մանրածախ առեւտրի խորհրդական Ֆրանսուա Լաֆոնտանի խոսքերը։
Ինչպես նշել է Le Figaro-ն, անբավարարությունն առաջին հերթին վերաբերում է մանանեխին, ձեթերին, սոուսներին, ալյուրին եւ սառեցված, աղի մթերքներին։ Որոշ մթերքների քանակը խանութներում նույն ժամանակահատվածում, ընդհակառակը, ավելացել է անցած տարվա համեմատ։ Խոսքը սուրիմիի (խեցգետնի մսի նմանակ), հալած պանրի, շոկոլադով հրուշակեղենի, պորտվեյնի եւ մանկական սննդի համար անհրաժեշտ կաթի մասին է։