«Կան մարդիկ, որոնք չեն լքել քաղաքը, գտնվում են Շուշիի տարբեր թաղամասերում» WarGonzo-ն նոր տեսանյութ է հրապարակել ԼՂ-ից

Ռուս լրագրող Սեմյոն Պեգովը WarGonzo նախագծի յութուբյան ալիքում հերթական տեսանյութն է հրապարակել Լեռնային Ղարաբաղից:

Տեսանյութի սկզբում լրագրողը ցուցադրում է Շուշին ու դրա շրջակայքը հեռվից:

«Սա Շուշին է և առաջնագիծը ներկա պահին»,-սկսել է լրագրողը:

«Քաղաքի մեծ մասը իսկապես ղեկավարում են Ադրբեջանի զինված ուժերը: Այստեղ, վերջին հարձակմանը, ինչպես ասում են տղաները, նետվել են մեկ բրիգադի չափով մարդիկ: Սակայն կարևոր է հասկանալ, որ Արցախի ռազմական ստորաբաժանումների մի մասը նույնպես գտնվում է Շուշիի տարբեր հատվածներում: Այստեղից խաչ է երևում, որի տակ տեղակայված են Արցախի պաշտպանության բանակի ավելի քան 100 մարտիկներ: Աջ ձեռքիս ուղղությամբ երևում է բանտը, դա ամրոցի մի մաս է, որտեղ նույնպես գտնվում է Արցախի պաշտպանության բանակի ստորաբաժանումներից մեկը»,-բացատրել է Պեգովը:

Նա նշել է նաև, որ քաղաքը ծանր հրետանային հարվածներ է ստացել, վնասվել են գազի ենթակառուցվածքները:

«Բոլորը լուրեր են սպասում Գորիսից, որին արդեն մոտեցել է ռուս խաղաղապահների ավտոշարասյունը: Ամենայն հավանականությամբ այն պետք է հասնի առնվազն մինչև Շուշի, այստեղ դիրքեր ստեղծի, որոնք պետք է ապահովեն հրադադարի ռեժիմը: Այժմ կարող եմ հաստատել, որ տարածքում լռություն է, այստեղ գալու ընթացքում որևէ կրակոց չեմ լսել: Եվս մեկ անգամ ընդգծում եմ, որ կան մարդիկ, որոնք չեն լքել քաղաքը, գտնվում են Շուշիի տարբեր թաղամասերում»,-եզրափակել է իր խոսքը ռուս լրագրողը: