ԵԱՀԿ ՄԽ համանախագահության փոփոխության փորձերն անընդունելի են․ Լավրով

ԵԱՀԿ Մինսկի խմբի համանախագահության փոփոխության փորձերն անընդունելի են։ Այս մասին օգոստոսի 26-ին Մոսկվայում հայտարարել է ՌԴ ԱԳՆ ղեկավար Սերգեյ Լավրովն իր ադրբեջանցի գործընկեր Ջեյհուն Բայրամովի հետ համատեղ մամուլի ասուլիսում։

Ի պատասխան հակամարտության կարգավորման հեռանկարներին առնչվող հարցին՝ Ջեյհուն Բայրամովը հատուկ շեշտել է Բաքվի դիրքորոշման կառուցողականությունը, որը մնում է բանակցությունների սեղանի շուրջ։

«Մենք հանձնառու ենք քաղաքական կարգավորմանը»,- հայտարարել է ադրբեջանցի նախարարը։ Նա հիշեցրել է «լուրջ իրավանորմատիվային բազայի, միջազգային կազմակերպությունների փաստաթղթերի» գոյության մասին՝ դրանցից առանձնացնելով ՄԱԿ ԱԽ բանաձեւերը եւ հետագա տարիներին ընդունված մի շարք այլ փաստաթղթեր։ «Բանակցային գործընթացը պետք է լինի կոնկրետ հարցերի շուրջ, պետք է լինի սուբստանտիվ, այլ ոչ թե իմիտացիոն»,- հայտարարել է Ջեյհուն Բայրամովը։

Սերգեյ Լավրովը համաձայնվել է, որ անհրաժեշտ է ղեկավարվել այն որոշումներով, որոնք ընդունել է միջազգային հանրությունը։ «Ներառյալ նաեւ ՄԱԿ ԱԽ բանաձեւերը, որոնք հետապնդում էին պատերազմը դադարեցնելու անհապաղ խնդիր, եւ հետագա փուլերում մշակված խաղաղ կարգավորման չափորոշիչները։ Այդ շրջանակները մշակվել են ԵԱՀԿ շրջանակում, որտեղ ստեղծվել է Մինսկի խումբը, որի համանախագահներն են հիմա Ռուսաստանը, ԱՄՆ-ն եւ Ֆրանսիան։ ԵԱՀԿ ՄԽ համանախագահների գծով կողմերի՝ Հայաստանի եւ Ադրբեջանի հետ միասին մշակվել է մոտեցումերի մանրամասների տարբեր աստիճանով փաստաթղթերի մի ամբողջ զանգված, բայց մեկ նպատակով՝ խնդիրը կարգավորել այն սկզբունքների հիման վրա, որոնք ամրագրված են ՄԱԿ կանոնադրության եւ ԵԱՀԿ Հելսինկյան եզրափակիչ ակտի մեջ։ Կան մի ամբողջ շարք փաստաթղթեր, որոնց տակ դրված են Ադրբեջանի եւ Հայաստանի նախագահների ու ԱԳ նախարարների ստորագրությունները՝ համանախագահների հետ միասին, որտեղ թեկուզ ամենաընդհանուր գծերով, բայց ամրագրված է կարգավորմանը համալիր մոտեցում, որը պետք է արդյունքում տանի խնդրի վերջնական լուծման»,- նշել է ՌԴ ԱԳ նախարարը։

Նրա խոսքով՝ մշակվել է բավականին լուրջ բազա եւ տխուր կլիներ կորցնել։ «Ցավոք, մենք տեսել ենք այդպիսի փորձեր, ներառյալ բանակցողների կազմի փոփոխության փորձեր, ինչն անընդունելի է, եւ մենք այդ մասին հայտարարել ենք։ Բայց ավելի ինտենսիվ բանակցություններն, իհարկե, չէին խանգարի»,- նշել է Լավրովը։

Նրա խոսքով՝ համանախագահները նախատեսել են հաջորդ ամիս այցելել Բաքու եւ Երեւան։ Նախատեսված է շփում կազմակերպել նաեւ նախարարների միջեւ։ Սակայն ծրագրերի իրականացման համար անհրաժեշտ է կարգավորել իրավիճակը, բացառել միջադեպերը ոչ միայն Ղարաբաղի շրջանում եւ շփման շրջաններում, այլեւ հայ-ադրբեջանական սահմանի շրջանում։ «Մենք մեծ հույս ունենք, որ այն, ինչ տեղի ունեցավ հուլիսին, այլեւս չի կրկնվի եւ մյուս շահագրգիռ երկրների, Ադրբեջանի եւ Հայաստանի բարեկամների հետ միասին ամեն կերպ կնպաստենք կարգավորմանը»,- ամփոփել է ՌԴ ԱԳՆ ղեկավարը։