Ռուսները Ստալինին, Պուտինին ու Պուշկինին պատմության ամենաականավոր մարդիկ են անվանել

Ռուսական «Լևադա կենտրոն» հետազոտական կազմակերպության անցկացրած սոցհարցման արդյունքները վկայում են, որ ռուսների մեծ մասի կարծիքով՝ ԽՍՀՄ առաջնորդ Իոսիֆ Ստալինը, Ռուսաստանի Դաշնության նախագահ Վլադիմիր Պուտինն ու պոետ Ալեքսանդր Պուշկինը պատմության ամենաականավոր դեմքերից են:

Ինչպես նշում է gazeta.ru-ն, սոցիոլոգները կազմել են ռուսների կարծիքով ամենաականավոր պատմական դեմքերի ցանկը: Ըստ այդմ՝ Ստալինը հավաքել է 38%, Պուտինն ու Պուշկինը՝ 34%, Լենինը՝ 32%, Պետրոս Առաջինը՝ 29%:

Լավագույն տասնյակում ներառվել են նաև տիեզերագնաց Յուրի Գագարինը, գրողներ Լև Տոլստոյն ու Միխայիլ Լերմոնտովը, խորհրդային զորավար Գեորգի Ժուկովը, Եկատերինա 2-րդ կայսրուհին:

Նշվում է, որ «Լևադա կենտրոն»-ի սոցհարցմանը մասնակցել է 18 և դրանից բարձր տարիքային խմբերի 1.600 ներկայացուցիչ՝ Ռուսաստանի 137 բնակավայրից:

tert.am