Գիտնականները հայտնել են հրաբուխների հնարավոր գլոբալ ժայթքման մասին

Ռուսաստանի ԳԱ մասնագետների կարծիքով՝ արդեն համեմատաբար մոտ ժամանակում Երկիր մոլորակը կարող է ենթարկվել հրաբուխների լայնածավալ ժայթքումների: Ընդ որում, ինչպես հայտնում է «Ակտուալնիյե նովոստի» համացանցային պարբերականը, գիտական աշխարհում ընդունված է գլոբալ ժայթքումներ անվանել նրանք, որոնց հետեւանքները մարդիկ կարող են զգալ մոլորակի այլ հատվածում:

Այդպիսի հետեւանքներ կարող են ունենալ, մասնավորապես, ջերմաստիճանի փոփոխությունը կամ ոչ ստանդարտ մայրամուտները, ինչպես դա հնարավոր է եղել դիտարկել Ինդոնեզիայի տարածքում՝ 1883 թվականին այնտեղ Կրակատաու հրաբխի ժայթքումից հետո: Ընդ որում՝ մարդկանց կյանքի վրա կարող են ազդեցություն գործել այդ կարգի նույնիսկ ամենաանշան իրադարձությունները: Օրինակ՝ սեյսմոլոգների համար գործող հրաբուխներն ակնհայտ վտանգ են ներկայացնում: Դա կապված է այն բանի հետ, որ հրաբխային մոխիրը, ամեն ինչից զատ, պարունակում է նաեւ բավականին կոշտ կտորներ, որոնք ընկնելով շարժիչների թիերի մեջ՝ կարող են այն շարքից հանել: Ընդ որում՝ օդաչուներն ամենեւին ոչ միշտ են ի վիճակի ժամանակին նկատել հրաբխային մոխրի նման ամպի մեջ հայտնվելը:

Որպես օրինակ կարելի հիշել նաեւ Ինդոնեզիայում Տամբորա հրաբխի ժայթքումը, որը տեղի է ունեցել 1815 թվականին: Այդ ժամանակ 2,5 հազար կիլոմետր տարածությամբ լսվել է ուժեղ պայթյուն, որից հետո մոխիրը իջել է 600 կմ-ից ոչ պակաս տարածքի վրա՝ փաստացի այն խորասուզելով մթի մեջ:

Գիտնականները նշում են նաեւ Սումատրայում 74 հազար տարի առաջ տեղի ունեցած Տոբա հրաբխի ժայթքումը: Որոշ ենթադրություններով՝ այդ ժամանակ այս իրադարձությունը կարողացել էր վերապրել միայն մոտ 10 հազար բնակիչ: