Վարչապետը նախկինում ԼՂ հարցի շուրջ արած իր հայտարարություններին որևէ բան ավելացնելու անհրաժեշտություն չի տեսնում

Հայաստանի վարչապետը նախկինում Լեռնային Ղարաբաղի հարցի շուրջ արած իր հայտարարություններին որևէ բան ավելացնելու, ինչպես նաև որևէ հայտարարություն սրբագրելու անհրաժեշտություն չի տեսնում: Այս մասին ի պատասխան «Ազատության» գրավոր հարցման` նշել են վարչապետի աշխատակազմից:

«Ազատությունը», մասնավորապես, հետաքրքրվել էր, թե հաշվի առնելով պաշտոնական Երևանի այն պնդումները, որ բանակցային սեղանին որևէ փաստաթուղթ չկա, որքանո՞վ է իրականությանը համապատասխանում Ռուսաստանի արտգործնախարար Սերգեյ Լավրովի վերջին հայտարարությունը, ինչ առաջարկներ են քննարկվել անցած տարի ապրիլին՝ Մոսկվայում, որին հղում է անում նա, արդյո՞ք այդ հանդիպման ընթացքում քննարկվել է խնդրի լուծման փուլային տարբերակը, և ո՞րն է պաշտոնական Երևանի դիրքորոշումը այդ տարբերակի շուրջ։ Բացի այդ, «Ազատությունը» հարցրել էր նաև` ինչ նախագծեր են այս պահին ակտիվորեն քննարկվում, բանակցային սեղանին ընդհանրապես կա՞ որևէ փաստաթուղթ, որքանո՞վ են դրանք ընդունելի հայկական կողմերի համար, և եթե Լավրովի հայտարարությունն իրականությանը չի համապատասխանում, արդյո՞ք պաշտոնական Երևանը պատրաստվում է բացատրություն պահանջել ռուսական կողմից։

«Միաժամանակ նշենք, որ ՀՀ արտգործնախարարությունը Ձեր կողմից նշված հարցերի վերաբերյալ ներկայացրել է բոլոր անհրաժեշտ պարզաբանումները»,- ասված է գրավոր պատասխանի մեջ:

Հիշեցնենք, որ Սերգեյ Լավրովը հայտարարել էր, թե Հայաստանի ու Ադրբեջանի արտգործնախարարներն այժմ ակտիվորեն քննարկում են ղարաբաղյան խնդրի կարգավորման նախագծեր, որոնք առաջարկվել են անցած տարի Մոսկվայում` ԵԱՀԿ Մինսկի խմբի համանախագահների մասնակցությամբ տեղի ունեցած հանդիպման ժամանակ: Ռուսաստանի արտգործնախարարը պնդել էր, թե քննարկվող փաստաթղթերի հիմքում խնդրի փուլային կարգավորման սկզբունքներն են, ըստ որի՝ առաջին փուլում պետք է ազատագրվեն Լեռնային Ղարաբաղի շուրջ մի շարք շրջաններ, ապաշրջափակվեն տրանսպորտային, տնտեսական ու հաղորդակցության այլ միջոցներ։