«Փնթի կարված գործ է, որն անհետևանք չի մնալու». պաշտպանը հաստատում է Միքայել Մինասյանին մեղադրանք առաջադրելու մասին լուրը
Երեկվանից մամուլում և սոցիալական ցանցերում տեղեկություն է շրջանառվում, թե քրեական գործ է հարուցվել Սուրբ Աթոռում ՀՀ նախկին դեսպան Միքայել Մինասյանի նկատմամբ և նրան կալանավորելու միջնորդություն է ներկայացվել դատարան։ 168.am-ի հետ զրույցում Մինասյան շահերի պաշտպան Միհրան Պողոսյանը հաստատեց տեղեկությունը՝ վստահեցնելով, որ առաջադրված մեղադրանքը չունի որևէ իրավական հիմնավորում և գործընթացը անհետևանք չի մնալու՝ ո’չ պատվիրատուների, ո’չ էլ կատարողների համար։
«Այո, դատարան է ներկայացվել միջնորդություն դեսպան Մինասյանին կալանավորելու վերաբերյալ։ Գործ ունենք դասական պատվերի հետ, որի շրջանակներում օրենքով նախատեսված քրեական հետապնդման փոխարեն իրականացվում է բացահայտ քաղաքական հետապնդում։ Սա փնթի կարված գործ է, որը, վստահեցնում եմ, անհետևանք չի մնալու՝ ո’չ պատվիրատուների, ո’չ էլ կատարողների համար։ Հավատացնում եմ, որ ներկայացված մեղադրանքը չունի որևէ իրավական հիմնավորում։ Այստեղ ընդհանրապես իրավաբանություն չկա»,- 168.am -ի հետ զրույցում ասաց փաստաբանը։
Նա հիշեցրեց, որ վարչապետ Նիկոլ Փաշինյանը անցած երկու տարիների ընթացքում իր գրեթե բոլոր ասուլիսներում ու ելույթներում հիմնազուրկ մեղադրանքներ է վերագրել Միքայել Մինասյանին.
«Երկու տարի անընդմեջ դեսպան Մինասյանի վերաբերյալ վարչապետի բոցաշունչ հայտարարություններից հետո առաջադրված քաղաքական մեղադրանքի ապօրինության և պարզունակության աստիճանը հավաստում է իրավական դաշտում ներկայիս ռեժիմի սնանկությունը։
Այսինքն, կա հրահանգ` ամեն գնով քրեական հետապնդում հարուցել դեսպան Մինասյանի նկատմամբ, բայց հրահանգը կատարողները, չկարողանալով իրավական դաշտում հասնել հաջողության՝ ստիպված են եղել դիմել գործ կարելու և ամեն գնով կալանքի հասնելու տխրահռչակ մեթոդաբանությանը: Իրավաբանության հետ կապ չունեցող շուրջ երկու տարի տևած այս գործողությունները խոսում են նրա մասին, որ նույնիսկ հրահանգ կատարողներն են խճճվել իրենց գործողություններում` չկարողանալով գոնե թե մեկ ապօրինության փաստ առաջ բերել և դրա շուրջ քրեական գործ կառուցել»:
Անդրադառնալով մեղադրանքի էությանը, փաստաբանն ասաց.
«Մինասյանին առաջադրված մեղադրանքը ներառում է երկու դրվագ։ Առաջինը վերաբերում է այն ժամանակահատվածին, երբ պարոն Մինասյանը Սուրբ Աթոռում ՀՀ դեսպանի պարտականությունը կատարելու նպատակով բացակայել է Հայաստանից կամ գտնվելով Հայաստանում՝ անձամբ չի գնացել առևտրային բանկ, փոխարենը օրենքով սահմանված կարգով տրված բանկային լիազորագրի հիման վրա՝ նրա օգնականը պարոն Մինասյանի՝ ՀՀ-ում գտնվող երկու անձնական բանկային հաշվեհամարներին մուտքագրել է պարոն Մինասյանին պատկանող կանխիկ դրամական միջոցները, որոնք հետագայում դեսպան Մինասյանի կողմից փոխանցվել են Իտալիայում գտնվող անձնական բանկային հաշվեհամարին։
Նշված գործողությունը քննչական մարմինը որակել է որպես ապօրինի հարստացում և փողերի լվացում։
Սակայն նշված դրամական միջոցները և դրանց առաջացման աղբյուրները ամբողջովին արտացոլված են դեսպան Մինասյանի՝ Էթիկայի հանձնաժողով ներկայացված գույքի և եկամուտների հայտարարագրերում։ Այսինքն, այստեղ որևէ խոսք չի կարող գնալ փողերի լվացման կամ ապօրինի հարստացման վերաբերյալ, քանի որ գործ ունենք բացառապես օրինական աղբյուրներից ձևավորված դրամական միջոցների հետ։ Սակայն առանց որևէ կերպ վերլուծելու նշված հայտարարագրերը՝ դեսպան Մինասյանին առաջադրվել է մեղադրանք, որում բառացիորեն երկու կարճ պարբերությունների սահմաններում վերլուծվում է նշված դրվագը՝ անտեսելով հրապարակված հայտարարագրերում նշված դրամական միջոցները և դրանց առաջացման օրինական աղբյուրները»։
Հարցին՝ երկրորդ դրվագը նույնպես վերաբերո՞ւմ է Էթիկայի հանձնաժողով ներկայացված հայտարարագրին, փաստաբանը պատասխանեց.
«Այո, այն վերաբերում է պարոն Մինասյանի կողմից դեռևս 2004 թվականին հիմնադրված ընկերության 20 տոկոս բաժնեմասի խնդրին։ Նշված մասով Մինասյանի 2017 թվականի հայտարարագրում առկա է տեխնիկական սխալ, քանի որ հայտարարագրում նշված բաժնեմասի վաճառքի գինը և պարոն Մինասյանի կողմից ստորագրված բաժնեմասի վաճառքի պայմանագրում նշված վաճառքի գինն իրար չեն համապատասխանում, ինչը քննչական մարնի կողմից որակվել է որպես ապօրինի հարստացում։
Նշված սխալը թույլատրվել է այն ընկերության աշխատակցի կողմից, որը դեսպան Մինասյանի հետ կնքված ծառայությունների մատուցման պայմանագրի հիման վրա պատասխանատու է եղել նշված բաժնեմասի հավատարմագրային կառավարման և Էթիկայի հանձնաժողով ներկայացվող հայտարարագրերի լրացման համար։
Ավելի քան մեկ ամիս առաջ մենք քննչական մարմնին ենք ներկայացրել միջնորդություն նշված ընկերության աշխատակիցներին հարցաքննելու վերաբերյալ, սակայն մեր ներկայացված միջնորդությունները թողնվել են առանց քննության։ Նույնանման միջնորդություն է ներկայացվել նաև հսկող դատախազին և կրկին՝ անարձագանք։
Արդյունքում ստացվում է, որ գործը քննող քննիչը որևէ կերպ չի արձագանքում նշված միջնորդությանը և չի ցանկանում հարցաքննել նշված տեխնիկական սխալը թույլ տված աշխատակցին, որպեսզի բացառվի դեսպան Մինասյանի մեղավորությունը հերքող որևէ փաստական տվյալների մուտքը իր վարույթում քննվող գործին, ինչը ևս մեկ անգամ փաստում է, որ մենք գործ ունենք ոչ թե քրեական, այլ քաղաքական վարույթի հետ, որը չի հետապնդում քրեական դատավարության օրենսգրքով սահմանված նպատակները։
Այնինչ տարրական իրավական գիտելիքներ չունեցող անձին պարզ է, որ համապատասխան ցուցմունքը պարզապես բացառում է նշված դեպքում հանցագործության հատկանիշների առկայությունը և հավաստում իրականացվող հետապնդման ապօրինի լինելը»։
Փաստաբանը նշեց, որ կալանքի առաջիկա նիստին իրենք ներկայացնելու են սխալ թույլ տված անձի՝ մասնավոր հարցման միջոցով տրված բացատրությունը և հիմք ընդունելով Եվրոպական դատարանի նախադեպային պրակտիկան՝ կմիջնորդեն նշված անձին դատական նիստին հրավիրելու համար։
«Հասկանալի է, որ քննիչի և հսկող դատախազի նման վարքագիծն ինքնագործունեության արդյունք չէ, այլ հետևանք է երկրի քաղաքական իշխանության ղեկավարի կողմից վերջին երկու տարվա ընթացքում պարբերաբար դեսպան Մինասյանի վերաբերյալ զրպարտչական բնույթի տարբեր հայտարարությունների և դրանք հավաստող որևէ տվյալ հայտնաբերելու անկարողության»,-ասաց Միհրան Պողոսյանը։
Գյումրի-Աշոցք և Գյումրի-Ջաջուռ ավտոճանապարհները փակ են բոլոր տեսակի տրանսպորտային միջոցների համար
Ով ինչպես է սիրում Հայաստանը
Չորս հայ գերրիներ են վերադարձել Հայաստան
Իրանը չունի ԱՄՆ-ի և Իսրայելի հшրվածներից վնաuված միջnւկային օբյեկտները վերականգնելու ծրագրեր. Արաղչի
Լինդա Էուլջեքջյանը հայտնել է, որ ամուսնու ազատ արձակման մասին իմացել է նույն օրը
«Գոլդեն Ֆլորենս»-ի արտադրական գործունեությունը կասեցվել է
ՀՅԴ-ն որոշում ունի․ որ ուժի հետ դաշինք կկազմի
«Իմացել ենք լուրը, շատ ուրախ ենք». Վագիֆ Խաչատրյանի դուստրը անհամբեր սպասում է գերությունից ազատ արձ...
Ես ուրախ եմ տեսնել հայ գերիների ազատ արձակումը
Հունվարի 1-ից սոցփաթեթի շահառուների համար հանվել է պարտադիր կանխարգելիչ բուժզննություն անցնելու պահա...