Նավթն էժանանում է կլիմայական համաձայնագրի վերաբերյալ Թրամփի որոշման պատճառով

Նավթի համաշխարհային գները նվազում են կլիմայի վերաբերյալ համաձայնագրից դուրս գալու ԱՄՆ նախագահ Դոնալդ Թրամփի որոշման առնչությամբ ներդրողների մտահոգության պատճառով: Այդ մասին են վկայում աճուրդների տվյալները, հայտնում է Reuters գործակալությունը:

Երևանյան ժամանակով ժամը 08:38-ի դրությամբ Brent ապրանքանիշի նավթի օգոստոսյան ֆյուչերսների արժեքը նվազել է 0,55 տոկոսով՝ հասնելով բարելի համար 50,35 դոլարի: WTI ապրանքանիշի նավթի հուլիսյան ֆյուչերսների գինը նվազել է 0,66 տոկոսով՝ հասնելով բարելի համար 48,04 դոլարի:

Ներդրողները մտավախություն ունեն, որ այդ որոշումը կարող է հանգեցնել ԱՄՆ-ում նավթահորերի հորատման, ինչը կնպաստի շուկայում «սև ոսկու» համաշխարհային ավելցուկի:

«Նման սցենարը բարենպաստ չի լինի նավթի գների համար»,- ասել է OANDA-ի ավագ վերլուծաբան Ջեֆրի Հալին:

ԱՄՆ նախագահ Դոնալդ Թրամփը, ելույթ ունենալով Սպիտակ տանը, հայտարարել էր Կլիմայական փոփոխությունների վերաբերյալ փարիզյան համաձայնագրից դուրս գալու որոշման մասին:

Փարիզյան համաձայնագիրը կնքվել է 2015 թվականի դեկտեմբերին, որի 195 մասնակիցները պայմանավորվել են թույլ չտալ մոլորակի վրա միջին ջերմաստիճանի բարձրացումն ավելի քան 2 աստիճանով:

tert.am