Թրամփը պատրաստ է օգնել Մեքսիկային թմրավաճառների դեմ պայքարում

ԱՄՆ նախագահ Դոնալդ Թրամփը Մեքսիկայի նախագահ Էնրիկե Փենյա Նյետոյի հետ հեռախոսազրույցի ժամանակ առաջարկել է ռազմական օգնություն ցուցաբերել երկրին՝ «վատ տղաների» հետ պայքարում օգնելու համար, հինգշաբթի, փետրվարի 2-ին հաղորդում է Associated Press–ը, հղում անելով զրույցի սղագրությանը։
«Այդտեղ դուք վատ տղաների մի ոհմակ ունեք։ Դուք բավարար միջոցներ չեք ձեռնարկում նրանց սանձելու համար։ Ես կարծում եմ, ձեր զինվորականները վախենում են։ Մեր զինվորները չեն վախենում, ես կարող եմ ուղարկել նրանց, որպեսզի հոգ տանեն այդ մասին»,– ասել է Թրամփը զրույցի ժամանակ, որը տեղի է ունեցել հունվարի 28-ին։

Իրականում ու՞մ ի նկատի ուներ Թրամփը վատ տղաներ ասելով, զրույցի այս հատվածից պարզ չի դառնում։ Մեքսիկական Aristegui Noticias պարբերականը հրապարակել է զրույցի մյուս հատվածը, որտեղից պարզ է դառնում, որ Թրամփը նկատի է ունեցել թմրանյութեր վաճառողներին։

Մեքսիկան պաշտոնապես ժխտում է հայտարարությունը այն մասին, որ Թրամփը սպառնացել է զորք մտցնել։ «Դա բացարձակ սուտ է», ասել է Մեքսիկայի նախագահի մամլո խոսնակ Էդուարդո Սանչեսը։ Մեքսիկայի արտաքին հարաբերությունների դեպարտամենտը երկու երկրների նախագահների զրույցը, իր հերթին, անվանել է «կառուցողական»։

Սպիտակ տան ներկայացուցիչը նույնպես հերքել է Թրամփի կողմից սպառնալիքների վերաբերյալ տեղեկատվութունը։ «Զեկույցը այն մասին, թե Նախագահը սպառնացել է ներխուժել Մեքսիկա՝ սուտ է։ Նույնիսկ մեքսիկայի կառավարությունը դա վիճարկում է», ասել է Թրամփի աշխատակազմի ներկայացուցիչը։

Նախագահի պաշտոնը զբաղեցնելուց հետո հենց առաջին շաբաթվա ընթացքում Թրամփը ստորագրեց Մեքսիկայի հետ սահմանին պատ կառուցելու մասին հրամանագիրը՝ իրագործելով նախընտրական իր գլխավոր խոստումներից մեկը։ Թրամփը հավաստիացրեց, որ պատի շինարարության համար գումարը կհատկացնի Մեքսիկան։ Մեքսիկայի նախագահը իր հերթին հայտարարեց, որ երկիրը հրաժարվում է վճարել պատի համար։

Top-News.am