Եկատերինբուրգում անվճար հաց բաժանող հայաստանցի գործարարը նոր նախագիծ է սկսել

Գործարար Արտակ Հակոբյանը` Եկատերինբուրգից, ով հայտնի դարձավ, երբ ԶԼՄ–ներում հայտնվեց թոշակառուներին եւ կարիքավորներին անվճար հաց բաժանելու նրա նախաձեռնության վերաբերյալ տեղեկատվությունը, այժմ նոր նախաձեռնությամբ է հանդես եկել։ Նախաձեռնությունը կոչվում է «Բարություն արա»։

Նախագիծը ցանկացած մարդու հնարավորություն է տալիս օգնել կարիքավորներին։ Հակոբյանի նախաձեռնության իմաստը հետեւյալն է. ցանկացած մարդ կարող է գործարարի խանութներից առցանց մթերքներ ձեռք բերել՝ մեծածախ գներով, որոնք հենց տեղում կբաժանվեն թոշակառուներին եւ կարիքավորներին։

Նախագծի թափանցիկության համար Արտակ Հակոբյանը որոշել է սոցիալական կայքի առանձին խմբում հրապարակել բարերարի անունը՝ նրա կողմից ձեռք բերված մթերքը կարիքավորներին հանձնելու ֆոտո հաշվետվությամբ։

Գործարարի խոսքերով՝ չնայած որ նախագիծը վերջերս է մեկնարկել, բարերարների աշխարհագրությունը արդեն ընդգրկում է ոչ միայն Ռուսաստանը, այլ նաեւ արտասահմանը։

Ավելի վաղ հաղորդել էինք, որ ծնունդով Եղեգնաձորցի Արտակ Հակոբյանը, Եկատերինբուրգի իր խանութներում անվճար հաց է բաժանում թոշակառուներին, սակայն ստիպված էր դադարեցնել բարեգործությունը՝ քաղաքացիների վատ վերաբերմունքի պատճառով։ Չնայած դրան, որոշ ժամանակ անց գործարարը կրկին վերականգնել էր անվճար հացի բաժանումը։

Top-News.am