Ժողովրդավար պետությունը Նիկոլ Փաշինյանի պլաների մեջ չի մտնում. իր պլանների մեջ միապետությունն է. Լիլիթ Թումանյան

 Բաց տեքստով անտեսվում են այն հիմնարար սկզբունքները, որոնք մինչև այս համարվում էին անհերքելի, այսինքն օրենքների սահմանադրականությունը , ժողովրդավարությունը , իշխանության ճյուղերի տարանջատումը , հավասարակշռումը, այսօր կարող ենք ասել, որ այդ ամենն այլևս չկա կամ սկսում է չլինել: Այս մասին այսօր հրավիրված ասուլիսի ընթացքում ասաց ArmNews FM-ի տնօրեն Լիլիթ Թումանյանը՝ անդրադառնալով ՍԴ-ի շուրջ ստեղծված իրավիճակին և ԱԺ-ի կողմից սահմանադրական փոփոխությունների նախագծին:

Նրա խոսքով՝ այն շարժումը, որի գլխին իշխանության եկավ Նիկոլ Փաշինյանը և իր կառավարությունը, արդեն իսկ հիմնված էր խախտումների վրա: Թումանյանն ասաց, որ կային իրավական անհամաչափություններ, իրավախախտումներ, որոնք, որ մինչ իր իշխանության գալը հարցականի տակ էր դրվում, բայց քանի որ դա մնաց անպատիժ, և որևէ գործողություն չխանգարեց լինել էլ ավելի ազատ, էլ ավելի առաջ գնալ սեփական նախագծերի մեջ, հասկանալի է, որ Նիկոլ Փաշինյանի առջև այժմ չկան որևէ խոչընդոտներ, որոնք կխանգարեն իրականացնել այն ամենը, ինչը ինքը կցանկանա:

«Միակ բանը, որ պարզ է, դա այն է, որ ժողովրդավար պետությունը Նիկոլ Փաշինյանի պլանների մեջ չի մտնում, իր պլանների մեջ մտնում է միապետությունը, իշխանության բոլոր ճյուղերի կենտրոնացումն իր ձեռքում, միանձնյա որոշումների կայացումը: Ըստ այդմ Հայաստանը որոշ ժամանակ հետո միջազգային կառույցների համար չի համարվի ժողովրդավար և օրենքի երկիր: Բազմաթիվ կարծիքներ հնչեցին երեկ, որ հնարավոր է՝ ընդամենը սպառնալիք է, որը գուցե չիրականանա, միտված է ՍԴ դատավորների վրա հոգեբանական ճնշում գործադրելուն, որպեսզի մինչև փետրվարի վերջ ստորագրեն իրենց թոշակի գնալու դիմումները»,- ասաց Թումանյանը:

Նրա կարծիքով՝ դրա համար պետք է որոշակի ժամանակ անցնի, և իրենք կկարողանան հստակ ասել՝ սա ինչ է, որովհետև կա՛մ կլինի հանրաքվե, կա՛մ չի լինի:

«Դեռ վերջանական փաստերը մեզ որևէ բան չեն կարող ասել և մենք առայժմ ենթադրում ենք, քննարկում ենք սցենարներ: Ինչ կլինի, եթե անցկացվի հանրաքվե այս ձևով, ինչ կլինի, եթե հանրաքվե չանցկացվի և ինչի համար է դա արվում: Ակնհայտ է, որ Սահմանադրական դատարանն իր դատավորներով խանգարում է որոշակի գործողությունների իրականացմանը որոշակի քաղաքական պլանների իրականացմանը այս իշխանությունների համար»,- ասաց Լիլիթ Թումանյանը: