Թուրքիայում չկա Հայոց ցեղասպանություն, չկա Կարո Փայլան, կա միայն ֆաշիզմ

Թուրք սյունակագիր Նուրեթթին Դեմիրթաշը yeniozgurpolitika.org կայքի իր սյունակում անդրադարձել է Թուրքիայի ընդդիմադիր Ժողովրդադեմոկրատական կուսակցության անդամ, խորհրդարանի հայազգի պատգամավոր Կարո Փայլանի աղմկահարույց ելույթին և դրան հաջորդած իրադարձություններին:

Ինչպես ավելի վաղ հայտնի է դարձել` ցեղասպանություն եզրույթի կիրառման համար Կարո Փայլանին զրկել էին խորհրդարանի երեք նիստին մասնակցելու իրավունքից:

«Կարո Փայլանն ասում է, թե լավ գիտի՝ ինչ է եկել իր նախնիների գլխին, կիրառում է այդ արգելված բառը, ասում է` ցեղասպանություն է իրագործվել: Փայլանին պատժում են, երեք նիստի մասնակցելու իրավունքից զրկում: Օգտագործած եզրույթն էլ նիստի արձանագրությունից հանվում է: Միջնադարում ամենավատ պատիժը եղել է մոռացության տալը, այսինքն` դու չկաս, չես էլ եղել, անուն և ինքնություն երբևէ չես ունեցել, դու երբևէ գոյություն չես ունեցել, չկաս: Թուրքիայում չկա Հայոց ցեղասպանություն, չկա Կարո Փայլան, կա միայն ֆաշիզմ»,- գրել է սյունակագիրն՝ ընդգծելով, որ Թուրքիայում հենց այդ կերպով են ցանկանում մոռացության տալ ցեղասպանությունն ու հայերին:

Նուրեթթին Դեմիրթաշը համոզված է, որ խորհրդարանը ցանկանում է պարտադրել Փայլանին հրաժարվել իր այդ կեցվածքից և փորձում է խորհրդարանի նիստերին մասնակցելու իրավունքից զրկելով «վախեցնել» նրան:

«Խորհրդարանն այսպիսի մի պատիժ է սահմանել Փայլանի դեմ. «Երեք նիստից հետո կարող ես գալ, մասնակցել, բայց դու այլևս դու չես լինի, ցեղասպանություն բառն էլ չես ասի»: Լավ, բայց 1915-ին տեղի ունեցածի մասին եթե հայերից չէ, ապա ումի՞ց պետք է լսենք: Սրա համար պետք է ընդամենը մի փոքր արդարացի լինենք», - նշել է սյունակագիրը:

Հիշեցնենք, որ Կարո Փայլանը խորհրդարանում սահմանադրական փոփոխությունների վերաբերյալ նախագծի քննարկման ժամանակ նշել էր, որ Թուրքիայում Սահմանադրության առաջին օրինակը կազմվել է հայերի կողմից, և ընդգծել, որ երկիրն ընկղմվեց քաոսի մեջ այն բանից հետո, երբ իշխանությունները սկսեցին ներկայացնել միայն թուրքերի շահերից բխող Սահմանադրության օրինակներ, ինչպես և հիմա:

«Այդ քաոսային շրջանում մենք կորցրինք չորս ազգի՝ հայերին, հույներին, ասորիներին և հրեաներին, որոնք մեծ կոտորածների և ցեղասպանությունների հետևանքով այս հողերից կա՛մ աքսորվել են, կա՛մ տանջանքների են ենթարկվել», - ասել էր Փայլանը:

Այս թեմայով Թուրքիայի ընդդիմադիր կուսակցապետի նկատմամբ հետաքննություն է սկսվել Թուրքիայում 5․8 մագնիտուդ ուժգնությամբ երկրաշարժ է տեղի ունեցել․ կա 1 զnh և 69 տուժած Զբոսաշրջիկները չեղարկում են դեպի Թուրքիա տուրերը՝ հնարավոր երկրաշարժերի պատճառով Անկարան ուշադիր հետևում է Ուկրաինայի բանակցություններին Հայաստանի եւ Թուրքիայի ներկայացուցիչները հանդիպել են հայ-թուրքական սահմանին