Մեր ձագուկները ներթափանցել են դեպի Սիրիայի խորքերը. Էրդողան

Թուրքիայի նախագահ Ռեջեփ Թայիփ Էրդողանը հայտարարել է, որ «Իսլամական պետություն» ահաբեկչական խմբավորման դեմ միակ լուրջ պայքար մղողը Թուրքիան է, այս մասին հայտնում է թուրքական gazeteduvar.com.tr կայքը:

Էրդողանը հայտարարել է, որ իրենց «ձագուկները»՝ թուրքական ԶՈւ-ի զինվորականները, ներթափանցել են դեպի Սիրիայի խորքերը՝ պայքարելով ահաբեկիչների դեմ:

«Մնացած բոլորը ոչ թե պայքարում, այլ միայն խոսում են դրա մասին», - հայտարարել է Էրդողանը:

Ըստ նրա՝ որևէ տարբերություն չկա ԻՊ-ի և Սիրիայում պատերազմող քրդական խմբավորումների միջև, և Թուրքիան շարունակելու է պատերազմել նաև նրանց դեմ:

Նշենք, որ թուրքական հատուկ նշանակության ուժերը 2016թ. օգոստոսի 24-ի առավոտյան մտել էին Սիրիայի տարածք՝ իրենց իսկ խոսքով՝ «Իսլամական պետություն» խմբավորման գրոհայիններից հյուսիսային Ջերաբլուս քաղաքի ազատագրման գործողության շրջանակում։ Թուրքական ԶՈւ-ն պայքարում էր նաև քրդական խմբավորումների դեմ:

«Եփրատի վահան» անվանումը ստացած ռազմական գործողության ավարտից հետո էլ այս տարվա ապրիլի 25-ին թուրքական ԶՈւ-ն օդային հարվածներ է հասցրել Սիրիայի հյուսիսային շրջաններին, որի հետևանքով մահացել է Սիրիայի տարածքում գործող քրդական ազգային ինքնապաշտպանության ջոկատների (YPG) 18 մարտիկ: