Ադրբեջանի ամենախոշոր բանկը հայտնվել է փլուզման եզրին

Ադրբեջանի ամենախոշոր բանկը՝ Ադրբեջանի միջազգային բանկը, որը հայտնվել է փլուզման եզրին երկրում արժույթի դեֆիցիտի և արժութային սուր ճգնաժամի հետևանքով, դադարեցրել է արտաքին պարտքի վճարումներ անել և պարտքի վերակառուցման շուրջ բանակցություններ կսկսի վարկատուների հետ, գրում է Bloomberg-ը:

Ադրբեջանի միջազգային բանկը մայիսի 10-ին բաց է թողել 100 միլիոն դոլարի ստորադաս փոխառության հիմնական մասի և տոկոսների գծով վճարումը, ասված է պետական բանկի հաղորդագրությունում:

Օտարերկրյա արժույթով նրա պարտքերի մի մասը կփոխարինվի Ադրբեջանի սուվերեն պարտատոմսերով, իսկ վերակառուցման առաջարկվող պլանը պարտավորեցնող կդառնա, եթե այն հավանության արժանացնեն վարկատուները, որոնց հասնում է գումարային արտահայտմամբ պարտքերի երկու երրորդը:

2019 թվականի մարումով բանկի պարտատոմսերի գինը հինգշաբթի 16 տոկոսի անկում է գրանցել, իսկ եկամտաբերությունն աճել է 14,188 տոկոսով: Վճարումների դադարեցման մասին որոշումը բանկն անվանել է «ցավալի»:

«Ադրբեջանի միջազգային բանկի ֆինանսական կենսունակության վերականգնումը վճռական նշանակություն ունի, որպեսզի բանկը կարողանա շարունակել կարևոր բանկային ծառայություններ տրամադրել Ադրբեջանի տնտեսությանը»,- ասված է ֆինանսների նախարար Սամիր Շարիֆովի հայտարարությունում:

Bloomberg-ի տվյալներով՝ այս տարի նավթի գների վերականգնումն այնքան էլ չի բարելավել Ադրբեջանի՝ նախկին Խորհրդային միությունում մեծությամբ երրորդ նավթարտադրող երկրի իրավիճակը, որն անցած տարի պայքարում էր իր արժույթի համար՝ արդեն 2015 թվականին երկու արժեզրկում գրանցելով: