Արման Սարգսյանը մանրամասներ է ներկայացրել ոստիկանների հետ միջադեպից

Հայաստանի Հանրապետության ոստիկանության պետի պաշտոնակատար Արման Սարգսյանը մանրամասներ ներկայացրեց հոկտեմբերի 15-ի լույս 16-ի գիշերը տեղի ունեցած միջադեպից, որի հետևանքով մեկ ոստիկան զոհվել է, մեկը՝ վիրավորվել: «Սուրբ Գրիգոր Լուսավորիչ» բժշկական կենտրոնում լրագրողների հետ զրույցում ՀՀ ոստիկանության պետի պաշտոնակատարը հայտնեց, որ ոստիկանության ծառայողի պարտականությունները կատարելիս՝ ոստիկանները նկատում են կասկածելի անձանց, հետամուտ են եղել այդ անձանց ինքնությունը ստուգելու:

«Երբ ոստիկանները մոտեցել են նշված անձանց, նշվածներն անմիջապես դիմել են փախուստի, մեր ոստիկանները հետապնդել են նրանց և կարողացել են մեկին բռնել: Երկրորդ անձը, որ մինչ այդ դիմել էր փախուստի, մթության մեջ անսպասելի հարձակվել է ոստիկաններից մեկի վրա և փորձել է ազատել իր բռնված ընկերոջը: Որոշակի քաշքշուկի ընթացքում նա հաջողացրել է պոկել մեր ոստիկանի ատրճանակը և արձակել կրակոց: Ենթադրաբար կենսական նշանակության օրգան է վնասվել, որովհետև նախնական տվյալներով մեկ կրակոց ունենք: Զենքը դեռ չի հայտնաբերվել, ի ուրախություն մեզ կարճ ժամանակահատվածում կարողացել ենք պարզել, երևի, որակումներ տալը ճիշտ չէ, բայց այս դեպքում՝ այդ ստահակներին, վերջիններս արդեն մեզ մոտ են, խոստովանում են»,- ասաց Սարգսյանը:

Նրա խոսքով՝ քննությամբ բոլոր հարցերի պատասխանները կտրվեն, հանգամանքները կպարզվեն, քննության լրիվությունը, բազմակողմանիությունը կապահովվի: «Այդ անձինք օրինապաշտ քաղաքացիներ չեն եղել, և մեր ոստիկանության ծառայողների, մասնագիտական լեզվով ասած օպերատիվ հոտառությունը չի դավաճանել և մոտեցել են ճիշտ մարդկանց: Ուղղակի ցավում եմ, որ նման դեպք է տեղի ունեցել: Նրանք հասցրել են կապ տալ, բոլորը մոտեցել են, բայց, ցավոք, մեր գործընկեր Տիգրան Առաքելյանի կյանքը հնարավոր չեղավ փրկել»,- ընդգծեց Արման Սարգսյանը:

Նա շեշտեց՝ ոստիկանի վրա ձեռք բարձրացնելը հավասարազոր է պետության վրա ձեռք բարձրացնելուն: «Եվ խստագույնս պատժվելու են նրանք, ովքեր կփորձեն այս կերպ կամ որևէ այլ կերպ պետության վրա ձեռք բարձրացնել: Սա նաև մեր համախմբվածության արդյունք է, որ իրավապահ մարմինները գիշերվա այս կարճ ժամանակահատվածում եղած օպերատիվ տեղեկությունների համադրմամբ , բոլոր հնարավոր միջոցների օգտագործման արդյունքում կարողացել են պարզել այդ անձանց ինքնությունը և նրանց բերման ենթարկել: Սպանվել է ոստիկան, սպանվել է իր ծառայողական պարտականությունները կատարելիս, չեմ վարանի ասել՝ խիզախաբար, որովհետև նրանք կարող էին չտեսնելու տալ, չմոտենալ, չհետապնդել»,- նշեց Արման Սարգսյանը:

Նա հավելեց, որ վիրավորված ոստիկանը երկարամյա ծառայության փորձ չունի, բայց զոհված ոստիկանը 38 տարեկան է: «Որքան գիտեմ լրանում էր նրա կենսաթոշակի անցնելու ժամկետը: Նա երեխաներ ունի: Պատրաստվում ենք պետության ողջ հնարավորությունների չափով օժանդակել մեր գործընկերոջը: Սա մեր բարոյական պարտքն է նաև խրախուսել և փառաբանել նման անձանց: Ես նախաձեռնելու եմ գործընթաց, որպեսզի նա պարգևատրվի»,- ընդգծեց ՀՀ ոստիկանության պետի պաշտոնակատարը: