Նախագահության տարիներին Թրամփը Forbes-ի վարկանշային ցանկում 119 հորիզոնական է կորցրել

ԱՄՆ նախագահ Դոնալդ Թրամփի կարողությունը, Forbes-ի հաշվարկներով, արդեն երկու տարի է՝ անփոփոխ է մնում՝ կազմելով մոտ 3,1 մլրդ դոլար:

Հեղինակավոր Forbes ամսագրի 2019 թվականի ամենահարուստ ամերիկացիների վարկանշային ցուցակում Սպիտակ տան ղեկավարն այս տարի զբաղեցրել է 275-րդ տեղը: Նշվում է, որ դա 16 հորիզոնականով ավելի ցածր է, քան մեկ տարի առաջ, և 119 տեղով ավելի ցածր, նախքան նախագահ դառնալը:

Սակայն Թրամփի ֆինանսական վիճակը կայուն չէ. նախագահի անվամբ գրանցված բիզնեսները կորուստներ են կրում: Կառուցապատողները, օրինակ, չեն ցանկանում շինությունները կոչել վերջինիս անունով: Թրամփի անշարժ գույքի լիցենզավորման բիզնեսը, որը նախագահության ժամկետներում չի կարող օտարերկրյա գործարքներ կնքել, այսօր արժե մոտ 80 մլն դոլար՝ անցյալ տարվա 170 միլիոնի համեմատ:

Սակայն նախագահի եկամուտն այլ բիզնեսներից սկսում է աճել, գրում է Forbes-ը:

Այս տարի ամենահարուստ ամերիկացիների եռյակում հայտնվել են՝ Amazon-ի հիմնադիր Ջեֆ Բեզոսը (114 մլրդ դոլար), Microsoft-ի հիմնադիր Բիլ Գեյթսը (106 մլրդ դոլար), ներդրող Ուորեն Բաֆեթը ($80,8 մլրդ):