Ցուցմունքիս մեջ գրել եմ՝ Հայկ Հարությունյանը երբեք ուժ կիրառելու հրաման չի տվել․ Ներսիկ Նազարյան

Երևանի նախկին ոստիկանապետ Ներսիկ Նազարյանը, որն աշխատել է նախկին ոստիկանապետ Հայկ Հարությունյանի հետ, ծանր է տանում վերջինիս ինքնասպանության լուրը։ «Շատ ցավոտ եմ տանում, շատ, իսկապես ցավալի է»,- Hraparak.am-ի հետ զրույցում ասաց Նազարյանը, որը ևս, Հայկ Հարությունյանի նման, ՀՔԾ-ում հարցաքննվել է Մարտի 1-ի գործով։

- Պարոն Նազարյան, Դուք Հայկ Հարությունյանի հետ շփվե՞լ եք այս ընթացքում։

- Չէ, ճիշտն ասած՝ չեմ շփվել, ոստիկանության տոնի օրերին զանգահարել եմ, շնորհավորել եմ իրեն միշտ, բայց շփում էդպես չի եղել իր հետ։ Իսկապես շատ ցավալի է, շատ մեծ ցավով եմ տանում։

- Ասում են՝ նրա ինքնասպանությունը կարող էր Մարտի 1-ի գործի հետ կապված լինել, ի՞նչ եք կարծում այս մասով։

- Չէ, չէ, ինձ տենց բան չի թվում, որովհետև ինքն ուժեղ մարդ է, տենց պրոբլեմներ ես չեմ տեսնում, որ Մարտի 1-ի հետ է կապված։ Իր ցուցմունքը կա, մարդը գնացել, ցուցմունք է տվել, դուրս է եկել, պրծել-ավարտվել է․․․ տենց բան ես չեմ պատկերացնում։ Դա շատ սխալ է կապել նման բաների հետ, և շահարկումները շատ սխալ են։

- Ի դեպ, Ձեզ վերջին անգամ ե՞րբ են կանչել ՀՔԾ՝ Մարտի 1-ի գործով հարցաքննության։

- Եղել է մոտ երեք ամիս առաջ։ Երկու-երեք անգամ կանչել են՝ պարզաբանելու հարցեր, ամեն ինչ։

- Իսկ Հայկ Հարությունյանի հետ կապված հարցեր տվե՞լ են Ձեզ հարցաքննության ժամանակ։

- Չէ… դե, պարզ է, որ քննության ընթացքում, որ խորհրդակցություններ է անցկացվել՝ էն, ինչ ինքն էլ է գրել, նույնն էլ՝ մերը, որ խորհրդակցություն է անցկացվել, թե ինչ պետք է արվի, ոնց պետք է արվի։ Էդ ամեն ինչը պարզաբանվել է, և ինձ չի թվում, որ նույնիսկ կարելի է էդ Մարտի 1-ի հարցը շահարկել։ Դա սխալ բան է շատ։

- Այդ դեպքում Հայկ Հարությունյանն ի՞նչ պատճառ ուներ նման քայլի դիմելու։

- Ճիշտն ասած՝ չեմ կարող ասել, որովհետև ինքը շատ թափով էր, ուժեղ, պինդ մարդ էր, դրա համար ես շոկի մեջ եմ։

- Մեզ տեղեկություն հասավ, որ Հայկ Հարությունյանի վերաբերյալ էլ են Ձեզ հարցեր ուղղել, և որոշ բաներ ասել եք նրա վերաբերյալ, գուցե նաև նրա դեմ եք ինչ-որ ցուցմունք տվել։

- Ոչ, ոչ, նման բան չկա։ Իմ ցուցմունքը կա, էնտեղ է, կարող եք կարդալ։ Ինձ հարց են տվել՝ խորհրդակցություն անցկացրե՞լ է, իհարկե, խորհրդակցություն անցկացրել է, որը նաև ինքը նշել է իր ցուցմունքում, որ հրավիրել է խորհրդակցություն, որի ժամանակ հարցրել է՝ ինչ պետք է արվի, ոնց պետք է արվի․․․ նման բաներ չկան, բացարձակ։ Դա հերյուրանք է, որ մարդիկ էսօր փորձում են ինչ-որ օգտագործել դա, և շատ վատ է դա։ Ասում են՝ Մարտի 1-ի հետ կապված ստիպում են․․․ բոլորս էլ գնում ենք քննության, դեռ որևէ մեկին որևէ պարտադրում կամ ստիպողականություն չի եղել։

- Վստա՞հ եք, որ որևէ մեկին չեն պարտադրում ցուցմունք տալ ինչ-որ անձանց դեմ։

- Ուրեմն բացառված է նման բան։ Հարյուրավոր մարդիկ են գնում էնտեղ, բոլորից էլ կարող էր ելնել, և մի տեղից ձայնը կլսվեր։ Մեր երկիրն էնքան փոքր է, մեր քաղաքն էնքան փոքր է։ Սովորական, նորմալ քննություն է գնում՝ պարզաբանելու համար իրավիճակը, թե ոնց է եղել, հանգամանքները պարզաբանելու․․․ և նման բան չկա՝ շատ հանգիստ, նորմալ աշխատանք է, որը, իհարկե, պետք է լինի, և բացահայտվեն հանցագործությունները և ամեն ինչը։

- Կասկածներ կան, որ Հայկ Հարությունյանը վաղը կարող էր որևէ կերպ հայտնվել մեղադրյալի աթոռին, և այդ վերահաս վտանգը կանխազգալով է գուցե իր կյանքին վերջ տվել։

- Ճիշտն ասած՝ չեմ կարող ասել նման բան, ինքն իր էությամբ նենց անձնավորություն էր, որ․․․ ես իմ ցուցմունքի մեջ էլ եմ գրել՝ Հայկ Հարությոնյանը երբեք ուժ կիրառելու հրաման չի տվել։ Կարող եք կարդալ-համոզվել՝ Հայկ Հարությունյանը մեզ նման ցուցում չի տվել։

- Այդ դեպքում ի՞նչը կարող էր պատճառ լինել նման քայլի գնալու համար։

- Ճիշտն ասած՝ 2008 թվականից ինքն էլ իմ նախարարը չէր, և այս 11 տարվա ընթացքում մեկ անգամ ինչ-որ թաղման արարողության ժամանակ եմ տեսել իրեն, դրանից հետո չեմ տեսել, չեմ կարող ասել։ Ինքը հոգեպես էլ, ֆիզիկապես էլ շատ պինդ անձնավորություն էր։ Եվ ինձ համար զարմանալի է։ Եթե իր նկատմամբ որևէ քայլեր էլ լինեին, ճնշում լիներ, մյուսը լիներ․․․ ինքը նախ տենց մարդ չի, որ իր նկատմամբ ճնշում գործադրեին։ Ինքը շատ ամուր, պինդ մարդ էր, որտեղ էլ որ պաշտոն զբաղեցրել է, ինքը շատ արժանավայել դիրք է ունեցել։ Եվ ինձ համար իսկապես զարմանալի է էս ամեն ինչը։ Բայց որ փորձում են շահարկել Մարտի 1-բան, դա սուտ է, նման բան չկա։