Դատավորի որոշում, որը փոխելու է երկրի ընթացքը

Այսօր դատավոր Աննա Դանիբեկյանը պետք է որոշում կայացնի ՀՀ նախագահ Ռոբերտ Քոչարյանի խափանման միջոց կալանքը փոխել–չփոխելու թեմայով, բայց սա սովորական դատական որոշում չի լինելու: Այս որոշումից է կախված լինելու երկրի զարգացման հետագա ընթացքը:

Որոշումը շուտով կհրապարակվի: Իհարկե, զուտ իրավական տեսանկյունից որոշումը պարզ է՝ Ռոբերտ Քոչարյանը պետք է ազատ արձակվի, բայց հաշվի առնելով իմքայլականների հայտարարությունները, Նիկոլ Փաշինյանի վերջին շրջանի գործողությունները, ստիպված ենք մտածել, որ կարող է եւ օրենքը ստորադասվել ինչ-որ մեկի կամքին եւ քմահաճույքներին:

Այն ինչ արեցին երեկ Արարատ Միրզոյանը, Լիլիթ Մակունցը, իմքայլական պատգամավորները՝ մեր երկրի ամոթն ու խայտառակությունն էր: Նրանք թքեցին պետության հիմքերի վրա, նրանք իրենց եւ իրենց առաջնորդի քմահաճույքը վեր դասեցին պետական շահից, օրենքներից եւ ազգային շահից:

Իսկ ի՞նչ կլինի, եթե դատավորը տեղի տա ճնշումներին եւ ակնհայտ ապօրինի որոշում կայացնի:

Իհարկե, մի փոքրաթիվ զանգված կհայտնվի հոգեխանգարմունքի մեջ, իրենց երջանիկ կզգան, բայց դա կարեւոր չէ, կարեւորն այն է, որ ապօրինի որոշումը կհանգեցնի ծանր հետեւնանքների:

Հայաստանը կհայտնվի բացարձակ հակաօրինական վիճակում՝ դրանից բխող բոլոր հետեւանքներով: Հայաստանը էլ ավելի հետ է շպրտվելու: Սկսվելու է մի գործընթաց, որը ոչ միայն ապօրինությունների շարքն է երկարացնելու, այլ Հայաստանը դարձնելու է ավելի աղքատ, ավելի խոցելի:

Երկրում էլ ավելի կխորանա եւ կխտանա ատելության եւ թշնամանքի մթնոլորտը: Կշարունակեն հակահեղափոխականների հետապնդումների, կշարունակվեն ապօրինի որոշումների կայացումները, կշարունակվեն պետությանը հարվածող օրենքների ընդունումները:

Իհարկե, այս ամենը երկար չի կարող տեւել հաշվի առնելով այն ռեսուրսը որ ունի իշխանությունը եւ այն քայլերի շարանը, որ նրանք անում եւ անելու են: Սա կարճ է տեւելու, բայց հետեւանքները ծանր են լինելու: Իսկ հետո գալու է մեկ այլ բարդ շրջան, երբ շատերն ամաչելու են իրենց արածների եւ ասածների, գրառումների եւ հայտարարությունների համար, երբ պատասխան են տալու իրենց գործողությունների համար: Եւ հենց այս փուլն է, որ պետք է հնարավորին չափ արագ անցնել, որ վերջապես Հայաստանը ընկնի զարգացման նորմալ ռելսերի վրա:

Հակոբ Ասատրյան

Top-News.am