ՌԴ-ից չի գալիս, որ չբռնեն, հենց եկավ, Նիկոլը կբռնի. Սեյրան Սարոյանը` Միհրան Պողոսյանի մասին

Ես քաղաքականությունից դուրս մարդ եմ, իմ ընտանիքը քաղաքականությունից դուրս ա, և ես թշնամիներ չունեմ: Լրագրողների հետ հանդիպման ժամանակ ասաց գեներալ-մայոր, նախկին պատգամավոր Սեյրան Սարոյանը:

Դիտարկմանը, որ ԱԺ-ում ստեղծվել է Ապրիլյան պատերազմի հանգամանքներն ուսումնասիրող քննիչ հանձնաժողով, արդյո՞ք նրան հրավիրել են, Սարոյանը բացասական պատասխան տվեց. «Ես խի՞, ինձ ինչի՞ պիտի հրավիրեն, հրամանատա՞ր էի, կամանդի՞ր էի: Դուք արդեն երևի մոռացել եք, ամսի 2-ին ես Քելբաջարում էի, Մանվելը՝ Հորադիզ: Առաջինը մենք ենք մեր տղերքով հասել այնտեղ: Հասել ենք ու զինվորի հետ միանգամից մտել ենք խրամատ»:

Լրագրողների դիտարկմանը, թե Նիկոլ Փաշինյանը բազմիցս նշել է, որ հետախուզությունը տվել է տվյալներ ապրիլյան պատերազմի հետ կապած և հետախուզության արդյունքները վկայում էին, որ Ադրբեջանը պատրաստվում է պատերազմին, Սարոյանն ասաց.

«Դա ամեն օր կա, ամեն օր զորք է կուտակվում սահմանին, ստեղից հանում են ընդեղ են կուտակում, ընդեղից հանում են այլ տեղ են կուտակում: Մենք անընդհատ ասում ենք, որ կրվանք, հո թուրքը չէր եկել էդ 2 պոստը գրավելու: Էն ժամանակ էլ եմ ասել, որ նրանք իրենց վրա էնքան վստահ էին, որ մտնելու էին՝ մաքրելով գնային, բայց չեն պատկերացրել, որ մեր տղերքը, մեր երեխեքը կգանգեն ու սենց կռիվ կտային»,-նշեց Սարոյանը:

Պատասխանելով մեկ այլ հարցի, որ ԱԺ-ում ստեղծված հանձնաժողովը, չի կարո՞ղ բացահայտել փաստեր, որով կկարողանան պատասխանատվության ենթարկել մի շարք պաշտոնատար անձանց, Սարոյանն ասաց, որ ինքն այնքան հանգիստ է Անդրանիկ Քոչարյանի հարցով, որ նա մինչև վերջ կգնա և ճշմարտությունը կասի:

Դիտարկմանը, որ վարչապետ Փաշինյանը հայտարարել էր, որ նախորդ իշխանության օրոք, զինվորներն անգամ պատշաճ ներքնազգեստ չունեին, սնունդը նորմալ չէր, իսկ այժմ 16 զորամաս բարձրակարգ սնունդ է ստանում, և ինչո՞ւ նախորդ իշխանությունն այս հարցով չէր զբաղվում, Սարոյանը պատասխանեց.

«Չեմ իմանում, օրինակ` ես սոված զինվոր կյանքում չեմ տեսել»:

Իսկ այն հարցին, թե նորմա՞լ է, որ գեներալ Միհրան Պողոսյանը քաղաքական ապաստան է խնդրում ՌԴ-ից, Սարոյանն ասաց, որ Միհրան Պողոսյանից նման արարք չի հավատում:

«Իսկ ՌԴ-ից չի գալիս, որ չբռնեն, հենց եկավ, Նիկոլը կբռնի, հո ախմախ չի, որ գա»:

Երկրապահ կամավորական միության նախագահի փոփոխության հետ կապված ասաց, որ նորմալ է վերաբերում, իրենց տղաներից մեկը պիտի լիներ:

Նա նաև հերքեց, որ իրավապահ մարմինների հետ որևէ խնդիր ունի: «Հիշում եք, ես դեռ «Հանրապետական» խմբակցությունում էի, որ ասացի, որ էդ կաստուրկից բան չեմ կերել, ինձ մոտիկ չթողեցին: Մեկ տարի է անցել, բոլորը խոշորացույցի տակով անցել են: Եթե ինչ-որ բան արած լինեի, իմ հետևից էլ կգային: Իսկ եթե վատ բան կանեմ, թող իրավապահները ներխուժեն իմ տուն»,- ասաց գեներալը: