Սասուն Միքայելյանը ՔՊ-ից չի կարող «պոկվել». Ալեն Սիմոնյանը՝ կուսակցության ներսում խմորումների մասին

Անհատների պարագայում մեղադրանք առաջադրելը ճիշտ չէ, որովհետեւ ըստ իս, պատճառները եղել են շատ: Այս մասին այսօր՝ հուլիսի 1-ին, ԱԺ-ում լրագրողների հետ զրույցում նշեց ԱԺ փոխնախագահ Ալեն Սիմոնյանը՝ անդրադառնալով Աբովյանի քաղաքապետի ընտրություններում ՔՊ թեկնածուի պարտությանն ու դրա համար մեղավորներին:

Նա չհամաձայնեց իր կուսակից Սասուն Միքայելյանի դիտարկմանը, թե դրա մեղավորը մարզպետ Ռոմանոս Պետրոսյանն է. «Ես էլ եմ մեղավոր այդ պարտության մեջ, որովհետեւ ժամանակ չեմ գտել ես նույնպես մասնակցելու քարոզչությանը:

Մենք այդ պատճառները քննարկել ենք, կարձագանքենք, հետեւություն կանենք, ինչպես նաեւ ընդունել ենք ի գիտություն»:

Ինչ վերաբերում է Սասուն Միքայելյանի հայտարարությանը, թե պետք է դասեր քաղել սխալներից, հակառակ դեպքում թավշյա հեղափոխությունը կարող է դառնալ թավշյա հեռացում, Ալեն ՍԻմոնյանն ասաց. «Քաղաքացին է որոշում, հեռացումը կլինի, թե չի լինի, թե դա ֆանտաստիկայի ոլորտից է, դա ժամանակը ցույց կտա: Դուք հիմա փորձում եք ինտրիգ գտնել այս ամենի մեջ, ոչ մի ինտրիգ չկա պարոն Միքայելյանի ասածի մեջ եւ ոչ մի ինտրիգ չի լինելու իմ ասածի մեջ: Եղել է այն, ինչ եղել է: Մենք հետեւություններ ենք արել, ի գիտություն ենք ընդունել մեր սխալները: Իհարկե, սխալներ եղել են, մենք պարտվել ենք, դա անժխտելի է»:

Ալեն Սիմոնյանը բացառեց, որ Սասուն Միքայելյանը կարող է հեռանալ «Քաղաքացիական պայմանագիր» կուսակցությունից. «Սասուն Միքայելյանը ՔՊ հիմնադիր անդամ է, հիմնադիր անդամը չի կարող «պոկվել»:

Որեւիցե խմորում չկա: Ինձ համար տհաճ է, որ Սասուն Միքայելյանը վարչության անդամ չէ, ձայները այդպես դասավորվեցին, բայց կուսակցությունը կենդանի օրգանիզմ է, տարբեր բաներ կարող են լինել»:

Ինչ վերաբերում է ՔՊ-ում տարբեր խմբավորումների առկայությանը, նա ասաց. «Մրցակցություն բոլոր տեղերում կա: Նույնիսկ այստեղ լրագրողների ու օպերատորների մեջ քիչ առաջ վեճ էր: Եկեք դա չքաղաքականացնենք այն առումով, որ տանենք դա բացասական քաղաքականության դաշտ: ՔՊ-ում ներքին խնդիր չկա, համենայնդեպս ես նման խնդրից տեղյակ չեմ»:

Բաժանորդագրվեք Top-News.am-ին Telegram-ում