Վարչապետի առաջարկած թեկնածուն դեմ չի, որ լինեն գերիշխող դիրք ունեցող կազմակերպություններ

ԱԺ-ն քննարկում է Հայաստանի Հանրապետության տնտեսական մրցակցության պաշտպանության պետական հանձնաժողովի անդամի ընտրության հարցը։ ԱԺ նախագահ Արարատ Միրզոյանը նշեց, որ ՀՀ վարչապետը ՀՀ տնտեսական մրցակցության պաշտպանության պետական հանձնաժողովի անդամի պաշտոնում առաջարկել է Էդգար Ճաղարյանի թեկնածությունը՝ երկու տարի ժամկետով։

Թեկնածուն ներկայացրեց իր կենսագրությունը, աշխատանքային ուղիները, անդրադարձավ ոլորտում առկա խնդիրներին:

ԲՀԿ խմբակցության պատգամավոր Սերգեյ Բագրատյանը թեկնածուից հետաքրքրվեց, թե ինչպիսի առաջարկ ունի, որպեսզի գերիշխող դիրքի հնարավորությունները նվազեն և որևէ տնտեսվարող իր գերիշխող դիրքը չչարաշահի։

Էդգար Ճաղարյանը նշեց, որ ինքն անձամբ դեմ չէ նրան, որ լինեն գերիշխող դիրք ունեցող կազմակերպություններ։

«Այսինքն՝ մարդ այդ գործում հաջողել է, շահույթ քիչ է ակնկալում և արդյունքում դարձել է գերիշխող, բայց հենց գերիշխող տնտեսվարողները պետք է ՏՄՊՊՀ-ի ամենօրյա ուշադրության ներքո լինեն, որ չչարաշահեն իրենց դիրքը, անբարեխիղճ բոլոր դրսևորումները պետք է բացառենք, համագործակցելով այլ կառույցների հետ, օգտագործելով ՏՄՊՊՀ-ի ողջ գործիքակազմը՝ պայքարենք անբարեխիղճ դրսևորումների դեմ»,-ասաց նա։