Արտահանման ուղիների բնականոն գործունեության թեման քննարկել եմ Վլադիմիր Պուտինի հետ. Փաշինյան

Գյուղատնտեսական ապրանքների արտահանման ոլորտում այս տարվա մայիսի տվյալներով շոշափելի շարժեր ենք ունեցել. բուսական եւ կենդանական ծագման ապրանքների արտահանումը նախորդ տարվա մայիսի համեմատ աճել է 76,6 տոկոսով: Այս մասին, այսօր՝ հունիսի 27-ին, կառավարության նիստի սկզբում հայտարարեց ՀՀ վարչապետ Նիկոլ Փաշինյանը:

Նրա խոսքով, բուսական ծագման ապրանքների մեջ կեսը եղել է լոլիկի մասով, արտահանումն աճել է 171 տոկոսով. «Ելակի արտահանումը կազմել է 700 հազար դոլար, որը 10 անգամ գերազանցել է նախորդ տարվա ցուցանիշը: Վարունգի արտահանումը կազմել է 1,1 մլն դոլար, աճը եղել է 5 անգամ: Արտահանվել է 3,2 մլն դոլարի թարմ ձուկ, որը 1,2 մլն դոլարով կամ 61 տոկոսով գերազանցել է նախորդ տարվա արտահանման ծավալը:

Հունվար-մայիսն ամփոփելով կարող ենք ասել, որ բուսական եւ կենդանական ծագման ապրանքների արտահանման աճը նախորդ տարվա համեմատ կազմել է 11,8 տոկոս: Ավելի քան հնգապատկվել է վարունքի արտահանումը, կրկնապատկվել է ելակի արտահանումը, 35 տոկոսով աճել է թարմ ձկան արտահանումը՝ կազմելով 12 մլն դոլար»,-ասաց Փաշինյանը:

Նա հավելեց, որ արտահանման ուղիների բնականոն գործունեության թեման մշտապես եղել է ՌԴ-ի ու Վրաստանի պաշտոնյաների հետ քննարկման օրակարգում. «Ես այս հարցը քննարկել եմ Վլադիմիր Պուտինի հետ: ՌԴ վարչապետ Դմիտրի Մեդվեդեւի հետ կոնկրետ պայմանավորվածություններ ենք ձեռք բերել, նաեւ Վրաստանի վարչապետ Մամուկա Բախտաձեի հետ քննարկումներ ենք ունեցել»:

«Արդեն մի քանի ամիս մեր տնտեսությունը գտնվում է լավ տրամադրության մեջ, լավ սպասումներ են ձեւավորվում:

ԿԲ-ի դոլարի պահուստներն ավելացել են 185 մլն դոլարով: Դա լավ ազդակ է, բայց մեր տնտեսությունը երկարաժամկետ առումով այնպես պետք է կառուցվի, որ հումքի արտահանումը նվազագույնի հասցվի կամ վերացվի: Այսինքն Հայաստանից ոչ թե պետք է հանքաքար արտահանվի, այլ մետաղական արտադրանք, ընդ որում որքան հնարավոր է երկար վերամշակման ցիկլ անցած»,-ասաց վարչապետը: