Վահե Գրիգորյանը մեզ հետ հանդիպում չի նախաձեռնել. ՍԴ անդամ Արեւիկ Պետրոսյան

ՍԴ-ում այսօր աշխատակարգային նիստ է տեղի ունեցել, որին չի մասնակցել միայն մեկ դատավոր. նիստը կայացել է սահմանված ընթացակարգով: Այս մասին, այսօր՝ հունիսի 21-ին, լրագրողների հետ զրույցում նշեց ՍԴ անդամ Արեւիկ Պետրոսյանը:

Նա ասաց, որ այդ նիստում ՍԴ դատավոր ընտրված Վահե Գրիգորյանի հայտարարությունը չի քննարկվել. «Աշխատանքային նիստերն ունեն կոնկրետ օրակարգեր, այդ օրակարգերով մենք մեր աշխատանքն իրականացրել ենք»:

Արեւիկ Պետրոսյանը հավելեց, որ Վահե Գրիգորյանը իրենց հետ հանդիպում չի նախաձեռնել. «Եթե լինի, մենք գործընկերներ ենք, կտեսնենք, թե ինչ է ասում»:

Նա չցանկացավ մեկնաբանել Վահե Գրիգորյանի հայտարարությունը՝ նշելով, որ եթե անհրաժեշտություն լինի մեկնաբանություն ներկայացնել, դատարանով ամբողջական դիրքորոշում կներկայացնեն:

«Վահե Գրիգորյանը ցանկություն է ունեցել իր դիրքորոշումներն արտահայտել, կարտահայտի, կքննարկենք, կհասկանանք: Կտեսնենք, թե ինչպես կշարժվենք առաջ»,-ասաց ՍԴ անդամը:

Այդ ժամանակ Արեւիկ Պետրոսյանին մոտեցավ մի մարդ եւ հայտարարեց. «ՍԴ-ն կարված էր Սերժ Սարգսյանի հագով եւ դուք բոլորդ կամակատարի նման ծառայում էիք նրան: Հիմա չեք փորձո՞ւմ հրաժարվել»:

Նշենք, որ այսօր՝ հունիսի 21-ին, ՍԴ-ն աշխատակարգային նիստում կայացրել է մի քանի որոշումները: Մասնավորապես, ՍԴ-ն քննության է ընդունել Ռոբերտ Քոչարյանի դիմումներից երկուսը, իսկ մեկը մերժել է: