Հեղափոխությունը հակահեղափոխական է դարձնում իր զավակներին

Ցանկացած հեղափոխական ուժ, որը վերցնում է իշխանությունը, դառնում է հակահեղափոխական։ Սա պատմական փորձով հաստատված քաղաքագիտական կանոն է։ Հայաստանը բացառություն չէ։

Ներկայիս իշխանություններն ամենահակահեղափոխականն են։ Նրանք հրաժարվել են և՛ հեղափոխության օրերին հնչեցրած սակավաթիվ կարգախոսներից ու ճիշտ հակառակն են անում, և՛ այն կոդից, որը փողոց էր հանել մարդկանց բազմությանը։

Հեղափոխությունը պահպանվել է ընդամենը կառավարման ձևի առումով։ Հանրահավաքային մեթոդը պահպանվել է։ Տարբերությունն այն է, որ հանրահավաքը փողոցից տեղափոխվել է կաբինետներ, միջազգային հարթակներ ու վիրտուալ տարածք՝ ծանր ու անհարմար վիճակի մեջ դնելով մեր երկիրը։

Մնացած առումներով հակահեղափոխությունն ամենուրեք է։

Չեմ զարմանա, եթե մի օր ԱԺ քաղաքական մեծամասնությունն, ըստ էության, օրենքից դուրս հայտարարի «թավշյա հեղափոխությունն» ու քրեական պատասխանատվություն նախատեսի մարդկանց կողմից փողոցը փակելու, դատարանների դռները մարդկանցով արգելափակելու, խորհրդարանին վարչապետի թեկնածու պարտադրելու, արագաչափերը «սկոչով» փակելու և նմանատիպ այլ հեղափոխական տեխնոլոգիաներ կիրառելու համար։ Եվ այդ ամենը կարվի հեղափոխական ոճի կարգախոսների ներքո, բնականաբար։

Անդրանիկ Թևանյանի ֆեյսբուքյան էջից