Ստյոպա Սաֆարյանի վտանգավոր անլրջությունը

Նախօրեին դաժան սպանություն է եղել, որին, ցավոք, հանրությունը բավական անտարբեր արձագանքեց: Իր պարտականությունները կատարելիս երկու ստահակների կողմից սպանվել է տաքսու վարորդը, որն ընդամենը պահանջել էր չծխել իր վարած ավտոմեքենայում:

Փոխարենը սպանությունը փորձեց շահարկման առարկա դարձնել ոչ անհայտ Ստյոպա Սաֆարյանը, պնդելով, թե սա հիբրիդային պատերազմի մի մաս է, հենվելով միայն նրա վրա, որ տաքսու սպանված վարորդը Սարգիս Ավագյանն է՝ Մարտի 1-ի գործով տուժող Արթուր Ավագյանի հայրը: Ստյոպա Սաֆարյանը պահը բացի չի թողել, հանրությանը մոլորեցնելու համար, ակնարկելով, թե այս ամենի հետեւում կանգնած է Ռոբերտ Քոչարյանը:

Բարեբախտաբար, Ստյոպա Սաֆարյանի անլուրջ եւ վտանգավոր գրառմանն արագ արձագանքեց ՀՀ Քննչական կոմիտեն, բացառելով, որ կատարված սպանությունը կարող է կապ ունենալ մարտի մեկի գործի հետ: 

Հասկանալով, որ կարող է վատ վիճակի մեջ հայտնվել, նա իր գրառումը հեռացրեց, բայց նշեց, թե բա մնում է իր նախկին տեսակետին, բայց գրառումը ջնջում է սպանվածների հարազատների խնդրանքով:

Ստյոպա Սաֆարյանի ասածներին եւ հայտարարություններին կարող է լուրջ վերաբերվել միայն նրան չճանաչողը: Այս երիտասարդը ժամանակին պնդել էր, թե ականատես է եղել ոստիկանական ավտոմեքենայի կողմից երկու քաղաքացիներին վրաերթի ենթարկելուն: Հետո, երբ նրան հրավիրել էին ցուցմունք տալու, խոստովանել էր, թե տեսել է ոչ թե ինքը, այլ լսել է ինչ-որ մեկից:

Իսկ հիշո՞ւմ եք Ստյոպա Սաֆարյանի այն հայտնի ասուլիսը, երբ նա պնդում էր, թե Գագիկ Ծառուկյանի գլխավորած խմբակցությունը կոալիցիա է կազմելու ՀՀԿ-ի հետ, ու նրա դեմքի արտահայտությունը, երբ հենց այդ պահին տեղեկացրին, որ պաշտոնապես արդեն նշվել է, որ ոչ մի կոալիցիա չի լինելու:

Վիքիլիկսի նյութերից էլ իմանում ենք, որ Ստյոպա Սաֆարյանը 2008 թվականի մարտի 1-ին վաղ առավոտյան զանգահարել էր Հայաստանում ԱՄՆ դեսպանատուն եւ հայտարարել, որ Ազատության հրապարակում ոստիկանները մանկահասակ տղայի են սպանել: Հաստատ նորից ոչ թե տեսել, այլ ինչ-որ մեկից լսել էր:

Անլուրջ մարդը անլուրջ է եւ 2008-ին, եւ 2012-ին եւ 2019-ին, եւ այն ժամանակ, երբ շատ դիպուկ մականունով են կնքել դեռ շատ տարիներ առաջ:

Եւ իսկապես ի՞նչ մտածես այն մարդու մասին, որը Արցախին, Արցախի ղեկավարներին, արցախցիներին ծաղրում է չճանաչված երկրների ֆուտբոլի Եվրոպայի առաջնությունը կազմակեպելու համար եւ հեգնանքով ասում, թե Աբխազիայի եւ Օսիայի հետ էշերի մրցում անցկացրեք:

Վահրամ Գեւորգյան

Top-News.am