Հայաստանի միջազգային հեղինակությանը մեջքից ուղիղ հարված էր. Զոհրաբյանը՝ դատարանների շրջափակման մասին (տեսանյութ)

Այսօր ԱԺ-ում լրագրողների հետ զրույցում ԲՀԿ խմբակցության պատգամավոր Նաիրա Զոհրաբյանն անդրադարձել է երեկ տեղի ունեցած դատարանների շրջափակման դեպքին և Նիկոլ Փաշինյանի ելույթին: Զոհրաբյանը համակարծիք է Փաշինյանի հետ այն հարցում, որ ՀՀ դատաիրավական համակարգը լուրջ հեղափոխական փոփոխությունների կարիք ունի, բայց դատարանները շրջափակելու կոչն անընդունելի իր և ԲՀԿ-ի համար.

«Բայց այն հակասահմանադրական կոչը, որ արվեց՝ շրջափակել դատարանները, ես նորից կրկնում եմ, և´ մեր հայտարարության մեջ նշված էր, որ մենք դա համարում ենք հակասահմանադրական կոչ, մենք դա համարում ենք Հայաստանի միջազգային հեղինակությանը մեջքից ուղիղ հարված, և պատահական չէ, որ միջազգային կազմակերպությունները բավականին կոշտ գնահատական տվեցին տեղի ունեցածին»,- ասել է Զոհրաբյանը:

Պատգամավորը նաև նշեց, որ դատարանների շրջափակման ժամանակ ոստիկաններն անգործության մեջ էին, և երբ դատավորը փորձում էր մտնել դատարանի շենք, ու ցուցարարները դրան բուռն արձագանքեցին, այդ ժամանակ ոստիկանները պարզապես կանգնած նայում էին ու չէին միջամտում:

«Վալերի՛յ Օսիպյան, դուք ձեր տեղում չեք»,- ասել է Զոհրաբյանը: