Այո՛, շոու բիզնեսը պետք է հարկվի

Պետական եկամուտների կոմիտեի նախագահ Դավիթ Անանյանը չի հերքում, որ ՊԵԿ աշխատակիցները այցելելու են ժամանցի վայրեր ու ռեստորանային համալիրներ՝ հորդորելով սեփականատերերին, որ շոու բիզնեսի ներկայացուցիչներին սահմանված կարգով աշխատավարձ ձևակերպեն։

«Ընթացիկ վերահսկողական մեխանիզմներ իրականացնում են մեր աշխատակիցները, այդ թվում նաև այցելում են ռեստորանային համալիրներ և կազմակերպություններ և հորդորում, որ հավաքույթների դեպքում սահմանված կարգով ձևակերպեն այդ մարդկանց աշխատանքը։ Դրանք զուտ հորդորի տեսքով են լինում»,- Կառավարությունում լրագրողների հետ ճեպազրույցում ասաց Դավիթ Անանյանը։

Ինչ վերաբերում է դիտարկմանը, թե ՊԵԿ նախագահն ասել է՝ Թաթան մերն է, իրեն չենք կպնում, Դավիթ Անանյանը պատասխանեց․ «Թաթան, կարծում եմ, որ համազգային է, ոչ միայն մերն է, այլ բոլորինն է։ Բայց եթե դուք կարծում եք, որ ինքն արտոնյալ է մնացածների համեմատ՝ հարկեր վճարելու առումով, ասեմ՝ ոչ, նման հայտարարություն չի եղել ու չի կարող լինել»։

Դավիթ Անանյանը ևս մեկ անգամ շեշտեց, որ իրենք ցանկանում ենք, որ շոու բիզնեսը հարկվի, բայց հավելեց, թե իրենք շոու բիզնեսից էլ են նման ազդակներ ստանում։

«Այո՛, իրենք էլ դեմ չեն, որ դա լինի։ Կարծում եմ՝ մոտակա ժամանակներում պետք է որոշակի քննարկումներ ունենանք և իրենց ուղղորդենք այն ճիշտ ճանապարհը, որ իրենք պետք է իրականացնեին դեռևս տարիներ առաջ։ Պետք է հանրային քննարկում ու փոխադարձ համաձայնություն ձեռք բերենք։ Մենք շոու բիզնեսին մատնանշեցինք զուտ այն պատճառով, որ հարկերի հավաքագրման առումով մշակույթի գործիչները մեզ աջակցեն»,-շարունակեց Անանյանը։

Վերջինս վստահեցրեց, որ հարկումը չի տարածվում բարեգործական համերգների վրա։