«Նրան այլ տեղ եմ հրավիրել». Պուտինի թիկնազորի նախկին ղեկավարը պատասխանել է Նավալնիի՝ բանավեճի հրավերին

Պուտինի թիկնազորի նախկին ղեկավար Վիկտոր Զոլոտովը՝ պատասխանելով Ալեքսեյ Նավալնիի՝ բանավեճի հրավերին, հայտարարել է, թե ինքն ընդդիմադիր գործչին «այլ տեղ է հրավիրել»:

Նախօրեին Նավալնին՝ պատասխանելով Ռոսգվարդիայի ղեկավար, նախագահ Վլադիմիր Պուտինի թիկնազորի նախկին ղեկավար Վիկտոր Զոլոտովի նետած մարտահրավերին, հայտարարել է, թե պատրաստ է նրա հետ բանավիճել դաշնային կամ ցանկացած հեռուստաընկերության ուղիղ եթերում:

Այսպիսով Նավալնին պատասխանել է Զոլոտովի տեսաուղերձին, որում գեներալն ընդդիմադիր գործչին մենամարտի էր հրավիրել և սպառնացել նրանից «հյութեղ բիֆշտեքս» պատրաստել:

Զոլոտովի այդ տեսաուղերձն էլ հաջորդել է Նավալնիի գլխավորած հակակոռուպցիոն հիմնադրամի հերթական հետաքննությանը, որն աղմկահարույց փաստեր է բացահայտել Ռոսգվարդիայի կոռուպցիոն գործարքների մասին:

«Ինձ մեղադրում են այն բանում, որ նրան հրավիրել եմ որպեսզի ծեծեմ՝ ինձ կոռուպցիոներ անվանելու համար: Դատարանի որոշումից հետո մենք կտեսնենք նա ճիշտ էր, թե՞ սխալ», - ասել է Զոլոտովը:

Երեկ ընդդիմադիր Նավալանին՝ դիմելով Զոլոտովին, կրկին պնդել է. - «Դուք գող եք, թալանում եք պետությունն ու ժողովրդին, ինչպես նաև՝ Ռոսգվարդիայի ձեր գործընկերներին»: