ԱՄՆ Դենվեր քաղաքում օծվել է Սուրբ Հռիփսիմե և Ամենայն Սրբոց Հայոց եկեղեցին
Հյուսիսային Ամերիկայի Հայոց Եկեղեցու Արևմտյան թեմի առաջնորդ Գերաշնորհ Տ. Հովնան արքեպիսկոպոս Տերտերյանի ձեռամբ օծվել է Դենվերի Սուրբ Հռիփսիմե և Ամենայն Սրբոց Հայոց եկեղեցին, հայտնում են տայ-ամերիկյան տեղեկատվական կենտրոնից։
Նորաօծ եկեղեցին Կոլորադոյի հայության համար դարձել է ավելի քան երկու տասնամյակ տևած սպասման, աշխատանքի, նվիրումի և համախմբման արդյունք։ Դենվերի հայ առաքելական համայնքը ձևավորվել է 2003 թվականին՝ որպես առաքելական ծուխ՝ հոգևոր ծառայություն մատուցելու նահանգում բնակվող հայերին։ Նույն թվականի դեկտեմբերի 10-ին Դենվերում մատուցվել էր առաջին Սուրբ Պատարագը՝ Տ. Տաթև քահանա Հարությունյանի ձեռամբ, Սուրբ Քեթրին հունական ուղղափառ եկեղեցում։
Օծման արարողության ընթացքում Հովնան արքեպիսկոպոս Տերտերյանը հայտարարել է եկեղեցու անունը՝ Սուրբ Հռիփսիմե և Ամենայն Սրբոց Հայոց եկեղեցի։
Սուրբ Հռիփսիմեի անունը նորաօծ եկեղեցուն հաղորդում է նաև պատմական և հոգևոր առանձնահատուկ նշանակություն։ Հայ Եկեղեցու ավանդության մեջ Սուրբ Հռիփսիմեն համարվում է Հայաստանի առաջին քրիստոնյա նահատակներից մեկը։
Իր խոսքում Առաջնորդ Սրբազանը շեշտել է, որ նոր եկեղեցին միայն շինություն չէ, այլ հավատքի, միասնականության և համայնքային շարունակականության կենդանի վկայություն։
Հայոց եկեղեցին սփյուռքում նաև լեզվի, մշակույթի և ինքնության պահպանման ամենակայուն միջավայրերից է։ Արևմտյան թեմի շաբաթօրյա և կիրակնօրյա դպրոցներում, թեմի ներսում գործող ամենօրյա դպրոցում, ինչպես նաև երիտասարդական ճամբարներում ամեն տարի ավելի քան 3000 երիտասարդներ շարունակում են կապը հայերեն խոսքի, հայոց պատմության, եկեղեցական ավանդության և մշակութային կյանքի հետ։ Այդ աշխատանքում ներգրավված են ավելի քան 220 ուսուցիչներ և դաստիարակներ, որոնք սերունդների միջև կենդանի կամուրջ են ստեղծում։ Դենվերի նորաօծ Սուրբ Հռիփսիմե և Ամենայն Սրբոց Հայոց եկեղեցին այս իմաստով միանում է ոչ միայն Արևմտյան թեմի հոգևոր ընտանիքին, այլև հայապահպանման այն լայն համակարգին, որտեղ եկեղեցին, դպրոցը, լեզուն և մշակույթը գործում են միասին՝ որպես մեկ ամբողջական պատասխան սփյուռքյան կյանքի գլխավոր հարցին՝ ինչպես մնալ հայ հեռու հայրենիքից։
Հայկական ֆուտբոլում հասունանում է իրավական նոր սկանդալ
Մոսկվան ենթարկվել է վերջին երկու տարվա մեջ ամենախոշոր հարվածին
Մ-20 ԱԱ. Յուրիկ Պետրոսյանը՝ հունահռոմեական ոճի ըմբշամարտի աշխարհի առաջնության արծաթե մեդալակիր
Վաղարշապատի համայնքային ոստիկանները երթուղայինի վարորդին և կարգավարին հայտնաբերել և ներկայացրել են ն...
Թրամփը դեռ չի որոշել, թե ո՛ւմ է աջակցելու Իսրայելի առաջիկա ընտրություններում
Սևանա լճի մակարդակը 50 սմ-ով բարձր է տարեսկզբի ցուցանիշից
Ռուսաստանը օգոստոսի 20-ի գիշերը բալիստիկ հրթիռներով հարվածել է Կիևին
Արարատի մարզում չրերի արտադրամասի գործունեություն է կասեցվել
Դավիթ Խուդաթյանը դիտարկել է Գյումրիում իրականացվող մի շարք ենթակառուցվածքային ծրագրերի ընթացքը
Մենք թույլ չենք տա մեզ վախեցնել. Գերմանիայի ԱԳՆ