Մեքսիկայում վերջին ամսվա ընթացքում 15 քաղաքական գործիչ է սպանվել

Մեքսիկայի տարբեր շրջաններում վերջին ամսվա ընթացքում 15 քաղաքական գործիչ է սպանվել: Ռիսկերի վերլուծության գծով մասնագիտացած Etellekt ընկերության այդ տվյալներն է ներկայացրել Economista թերթը, գրում է ТАСС-ը:

Etellekt-ի հաշվարկների համաձայն՝ 2017 թվականի սեպտեմբերից ի վեր լատինամերիկյան այս երկրում սպանվել է 93 քաղաքական գործիչ, նրանցից 29-ը պատրաստվում էր առաջադրվել պաշտոնի, ևս 9-ը եղել է գրանցված թեկնածու:

Այդ տեսակի սպանությունների ամենամեծ թիվը՝ 21, գրանցվել է հարավ-արևմտյան Գերերո նահանգում:

Հետազոտողները նշում են, որ Մեքսիկայում քաղաքապետերը 12 անգամ ավելի շատ հավանական է, որ սպանվեն, քան սովորական քաղաքացիները:

Երկրում ընթացիկ ընտրական գործընթացն ավարտվելու է հուլիսի 1-ին: Այդ օրը քաղաքացիները պետք է ընտրեն նախագահ, 128 սենատոր և խորհրդարանի ստորին պալատի 500 պատգամավոր, մի շարք նահանգապետեր և քաղաքապետեր: