Մեքսիկայում թեկնածուները կարող են իրենց մականունները եւս նշել քվեաթերթիկներում

Մեքսիկայի նահանգներից մեկում թեկնածուներին թույլ են տվել քվեաթերթիկներում իրենց անունների կողքին նշել նաեւ մականունը: Մեքսիկայում տեղական ինքնակառավարման մարմինների ընտրությունները տեղի են ունենալու հուլիսի 1-ին, դրանց կմասնակցի 194 թեկնածու, փոխանցում է AP-ն:

Նուեւո-Լեոն նահանգի ընտրական հանձնաժողովը որոշել է, որ նահանգի օրենքը օրենսդիր ժողովի եւ տեղական պաշտոնների թեկնածուներին թույլ է տալիս օգտագործել իրենց մականունները, որոնք գռեհիկ չեն կամ մարդկանց համար վիրավորական չեն: Սա Մեքսիկայի համար նորմալ է՝ հաշվի առնելով, որ նահանգապետն իրեն մականունով է ներկայացնում՝ «Էլ Բրոնկո»: Այնպես որ՝ թեկնածուների ցանկում տեսնելով «Էլ Բիգոտոն» («Մեծ բեղեր»), «Լա-Կոմադր» («Կնքամայր») եւ «Պատի Տամալես», ընտրողները չեն զարմանա:

Մականունների օգտագործումն այնքան տարածված է դարձել, որ շատերը դժվարությամբ են հիշում նահանգապետի իսկական անունը՝ Խայմե Ռոդրիգես Կալդերոն: Նա հիմա արձակուրդում է եւ նախագահի պաշտոնի անկախ թեկնածու է:

Հանձնաժողովը թեկնածուներին մականունների օգտագործումը թույլատրել է 2015 թվականին: Սակայն որոշ մականուններ անթույլատրելի է համարել, այդ թվում՝ «Մի Գալո»-ն («Իմ աքաղաղ»), արտահայտություն, որը սովորաբար օգտագործվում է ընտրված թեկնածուին նկարագրելու համար: Այս տարի հանձնաժողովը բացառել է «Միավորել մարդկանց» մականունը: