Սա օրինակելի ծրագիր է, այս սակագինը աննախադեպ է աշխարհում. Կարեն Կարապետյանը՝ Մասրիկ–1 մրցույթի մասին

Ներդրողների մոտ մեր էներգետիկ համակարգի եւ ներդրումային քաղաքականության նկատմամբ բարձր վստահություն կա: ԱՅս մասին Facebook-ի իր էջում գրել է ՀՀ վարչապետ Կարեն Կարապետյանը՝ ներկայացնելով Մասրիկ–1 ծրագրի ներդրողների մրցույթի արդյունքները։

Նա, մասնավորապես, գրել է.

«Ավարտվեց Մասրիկ-1 ծրագրի ներդրողների մրցույթը։ Ըստ մրցույթի կանոնների՝ այն ընկերությունը կամ կոնսորցիումը, ով կառաջարկեր ամենացածր սակագինը, իրավունք կստանար իրականացնել Մասրիկ-1 55 ՄՎ արեւային կայանի կառուցման ծրագիրը:

Մրցույթի արդյունքներով ամենացածր սակագինը ներկայացրել է նիդեռլանդական Fotowatio Renewable Ventures B.V եւ իսպանական FSL Solar S.L. ընկերություններից կազմված կոնսորցիումը: Առաջարկված սակագինն է 0.0419 ԱՄՆ դոլար՝ առանց ԱԱՀ-ի (20.11 դրամ):

Համեմատության համար, ներկայումս Հայաստանում գործող բնական ջրահոսքերի վրա փոքր հիդրոկայանների համար սակագինը 23.8 դրամ է: Այս սակագինը աննախադեպ է աշխարհում նման համեմատաբար փոքր հզորության միջազգային մրցույթների համար։

Սա վկայում է ներդրողների մոտ մեր էներգետիկ համակարգի եւ մեր կողմից վարվող ներդրումային քաղաքականության նկատմամբ բարձր վստահության մասին։ Այս ծրագիրը նաեւ օրինակելի եւ նախադեպը չունեցող ծրագիր է՝ պետական֊ մասնավոր համագործակցության համատեքստում։ Կոտրելով բոլոր կարծրատիպերը՝ այս մրցույթը նոր եւ չափազանց կարեւոր հեռանկարային փուլ է բացում դեպի անվտանգ եւ անկախ էներգետիկ համակարգ»:

Լուրեր Հայաստանից - NEWS.am