Թբիլիսիի օպերայի և բալետի պետական թատրոնում կայացավ Հայաստանի ազգային ֆիլհարմոնիկ նվագախմբի գալա համերգը
«Հայաստանի մշակույթի օրերը Վրաստանում» ծրագրի հանդիսավոր բացումն ազդարարվել է Հայաստանի ազգային ֆիլհարմոնիկ նվագախմբի գալա համերգով, որը տեղի է ունեցել Թբիլիսիի Զաքարիա Փալիաշվիլու անվան օպերայի և բալետի պետական թատրոնում։ Ծրագիրը նվիրված է ՀՀ ասնկախության 35-ամյակին։
Շնորհավորելով Վրաստանում Հայաստանի մշակույթի օրերի մեկնարկի կապակցությամբ՝ ԿԳՄՍ նախարար Ժաննա Անդրեասյանը նշել է՝ Հայաստանի և Վրաստանի բարեկամության դարերի պատմությունը հիմնված է ոչ միայն ընդհանուր տարածաշրջանի, հարևանության ու պատմական առնչությունների, այլև մարդկային ամուր կապերի, փոխադարձ հարգանքի և մշակութային հարուստ երկխոսության վրա։
«Այս տարի Հայաստանի Հանրապետությունը նշում է իր անկախության 35-ամյակը։ Պահպանելով ինքնության ու մշակութային ժառանգության հարուստ ավանդույթները՝ մեր պետությունը շարունակել է զարգանալ և ներկայանալ աշխարհին իր մշակույթի բազմազանությամբ ու ստեղծագործական ներուժով։ Անցած տասնամյակները կարևոր ժամանակահատված են եղել մեր երկու պետությունների հարաբերությունների զարգացման և փոխադարձ համագործակցության ամրապնդման համար։ Այսօր ռազմավարական գործընկերության մակարդակի բարձրացված այդ հարաբերություններն ընդգրկում են բազմաթիվ ոլորտներ, իսկ մշակույթն իր առանձնահատուկ տեղն ունի այդ համագործակցության մեջ՝ ստեղծելով մարդկանց, հասարակությունների և ստեղծագործական համայնքների միջև անմիջական շփման ու փոխադարձ ճանաչման հնարավորություններ։
Հայաստանի մշակույթի օրերի անցկացումը Վրաստանում հրաշալի առիթ է՝ ներկայացնելու ժամանակակից Հայաստանի մշակութային դիմագիծը, մեր ավանդական և ժամանակակից արվեստը, մեր ժառանգությունն ու այն ստեղծագործական ներուժը, որով այսօր ապրում և զարգանում է հայկական մշակույթը»,- ասել է ԿԳՄՍ նախարարը և շնորհակալություն հայտնել Վրաստանի մշակույթի նախարարությանը, Վրաստանում Հայաստանի Հանրապետության դեսպանությանը և մյուս գործընկերներին՝ միջոցառման կազմակերպման համար։
Միջոցառմանը ողջույնի խոսքով հանդես են եկել Վրաստանում ՀՀ արտակարգ և լիազոր դեսպան Աշոտ Սմբատյանը և Վրաստանի մշակույթի նախարարի տեղակալ Նաթիա Շամաթավան:
Վրաստանի մշակույթի նախարարի տեղակալ Նաթիա Շամաթավան ընդգծել է Հայաստանի և Վրաստանի դարավոր բարեկամությունը, ընդհանուր մշակութային արժեքներն ու արվեստի ոլորտում ձևավորված համագործակցության ավանդույթները։ Նա վերահաստատել է Վրաստանի մշակույթի նախարարության պատրաստակամությունը՝ խորացնելու երկու երկրների համագործակցությունը երաժշտության, թատրոնի, կինոյի, մշակութային ժառանգության պահպանության և այլ ոլորտներում։
Համերգային ծրագրում Հայաստանի ազգային ֆիլհարմոնիկ նվագախումբը՝ գեղարվեստական ղեկավար և գլխավոր դիրիժոր Էդուարդ Թոփչյանի ղեկավարությամբ և թավջութակահար Նարեկ Հախնազարյանի մասնակցությամբ, ներկայացրել է Արամ Խաչատրյանի, Զաքարիա Փալիաշվիլիի և Անտոնին Դվորժակի ստեղծագործությունները։
Միջոցառմանը ներկա են եղել նաև Վրաստանի խորհրդարանի նախագահի առաջին տեղակալ Գիորգի Վոլսկին, նախարարության ներկայացուցիչներ, Հայաստանի պատվիրակության անդամներ, հայ համայնքի ներկայացուցիչներ և հրավիրված հյուրեր։
«Տիեզերական ճամփորդություն» Երևանում. մեկնարկել է HIGH FEST-ը
2027-ից կենսաթոշակները կբարձրանան․ ի՞նչ է փոխվելու
Մարտունիում մեծարել են համայնքի երկու ամենատարեց կանանց
Դանի Օլմոն շարունակում է քաղաքին փոխանցել իր եկամտի 2%-ը
Ռոնալդուի անձնական ինքնաթիռը մեկնել է Մադրիդ
Երաշխավորվել է նախադպրոցական հաստատության աշխատողներին և դաստիարակի օգնականներին վերապատրաստող 6 կազ...
Հրապարակվել են վարորդական իրավունքի վկայական ստանալու տեսական քննության նոր հարցաշարերը
Շաքիում արձանագրված դեպքով նախաձեռնվել է ևս մեկ քրեական վարույթ. ՀՀ գլխավոր դատախազություն
Պատգամավորները տեսակցել են Շաքիում ադրբեջանցու կրակոցից վիրավորում ստացած կնոջը և նրա երեխաներին
Prada-ն ավելի մեծ ուշադրություն է դարձնում գերհարուստ հաճախորդներին